PARROT-TREE - Powered by Discuz! Board

標題: 驚心動魄、細膩溫情，大團圓搵雀記(連載完畢) [打印本頁]

作者: sodagreensimon 時間: 2011-6-22 21:00 標題: 驚心動魄、細膩溫情，大團圓搵雀記(連載完畢)

係度再次多謝鸚鵡樹朋友既關心, 今日開始有多些時間, 同大家交待下前日GARU走失既事。

   話說前日我點零鐘放咗工, 施施然同事食LUNCH吹水, 兩點零返到屋企, 諗住返屋企沖個涼就攞啲公司嘢去星巴巴度打躉, 點知一打開度門, 就發覺唔多妥, 見到全屋既窗連窗花都開哂, 我下意識望向GARU個籠, 發現GARU唔係籠入面, 全屋得廁所度門係閂埋, 我以為阿媽同GARU仔沖緊涼, 點知一打開門, 原來鐘點係度洗緊廁所, 正當我疑惑點解我阿媽唔係屋企, 操鄉音既鐘點就好輕鬆咁同我講：「你隻雀仔飛走咗！」我即刻大叫一聲, 腦中一片空白,個鐘點又講：「你阿媽落咗去搵！」我即刻攞個電話出黎想打俾阿媽, 個鐘點又好冷靜咁話：「你阿媽冇帶電話呀！」我真係啤咗一聲, 無言以對。

   二話不說即刻衝落樓, 一落到樓就問樓下個管理員有冇見到GARU, 結果就話冇, 我落到樓先發現, 我原來冇問隻雀飛咗去邊個方向, 我家大廈坐落慈雲山頂, 仲要住39樓, 屋企窗口極為開揚, 可遠望港島, 而大廈後則係茂密叢林, 真係唔知由邊度搵起。我唯有從後門出發, 沿路叫著GARU個名, 可惜毫無回音。

   我從後門走到屋苑正門,我發現到阿媽披頭散髮, 着住套睡衣不修邊幅係度大叫GARU, 我即係衝埋去, 佢即刻攬住我, 喊到呼天搶地：「GARU飛走咗喇, 冇喇冇喇, GARU飛走咗喇, 我當佢係第二個仔黎架, 會唔會搵得返架? 人哋話會飛返屋企架…………….」真係聞者傷心, 聽者流淚, 心痛死我。呢個時候隔離有個女人就講：「你阿媽係度搵咗好耐喇, 一啖水都未飲過, 快啲扶佢去休息下先喇！」我睜眼一望, 原來係屋苑管理處既職員,我望望阿媽, 嘩, 面色真係好差喎, 天氣咁熱, 再曬就真係中暑喇, 我就一路扶佢去不遠既管理處, 心入面一直盤算着如何找救兵。

作者: sodagreensimon 時間: 2011-6-22 21:01

呢個時候第一個當然諗起主席喇, 但我醒起主席今日有外出工作, 得啤梨一個人睇鋪, 行唔開, 所以我第一個打俾同樣住係東九龍既好友AGNES, 我好冷靜咁同agnes講：「GARU走咗, 可唔可以幫手搵雀呀? 我阿媽而家喊到死….」agnes：「吓！我而家飛的黎！」同時我同管理員姐姐一齊扶阿媽到咗管理處office, 佢哋仲即刻倒咗杯水俾我阿媽飲, 非常細心, 但我阿媽伏咗係管理處張枱, 一路係咁叫GARU, 一路係咁話頭痛, 真係俾佢嚇死, 坦白講, GARU事小, 阿媽事大, 一陣有咩事我都唔知點算！

跟住我就打俾啤梨, 啤梨立刻將呢個消息POST上鸚鵡樹, 同時CALL齊一眾至親好友, 包括在荃灣剛剛上緊粵曲堂既carolee同empire, 係深水埗既SAM哥, 而empire又聯絡係公司打緊仗既TEDDY, 及其他好友。empire一收到啤梨電話, 就同carolee講：「冇得唱喇, garu仔走咗呀！」carolee立刻掉哂啲鈴鈴查查, 立刻同empire飛的士黎, 而SAM哥亦掉下鋪頭既工作, 立刻坐士趕來 ,同時間,teddy同啤梨各自係公司安排印製傳單街招等事宜。而我亦打俾正在紅磡返工既mavisweet請佢掉底手上既工作黎幫手, 我呢個時間已經慌不擇路, 冇人性到連遠在港島上班既chaichai我都打佢主意：「GARU走咗呀, 如果你放工可以的話, 黎幫幫手喇！」

係呢個時候我阿媽堅持話要返屋企, 話GARU可能會識飛返屋企, 要返屋企等佢喎, 咁返屋企俾阿媽休息下都好既, 咁就陪佢返去喇, 點知一返到屋企, 仲見到個鐘點施施然咁係度打掃, 我把火即刻滾咗上黎, 但阿媽一入到屋, 就打開個廳個窗, 大聲叫：「GARU仔返黎喇！返黎喇！」我聽到真係鼻頭一酸。係呢個時候, 我就乘機問清楚件事係點發生, 原來阿媽放GARU出黎玩, 平時屋企窗口裝好鐵絲網, GARU一定走唔甩, 而我廳個窗口, 整咗個兩屋既企架俾GARU仔玩, 而鐘點就好唔用個腦咁擅自打開個窗黎抺, 又冇通知聲阿媽, 等阿媽將GARU仔放返入籠, 據我估計係GARU仔想飛返去平時佢個企架度時, 先發玩個窗花連個企架移開咗, 收掣不級就飛咗出街, 據鐘點所講, GARU仔朝左手邊兩幢大廈中間飛去。咁我就即刻入房換衫, 攞埋望達鏡出發！

作者: sodagreensimon 時間: 2011-6-22 21:01

正當我換緊衫之際, SAM哥就打電話黎, 話佢搭緊的士黎, 真係好感動, 因為我知佢鋪頭好忙。我一換好衫, 仲見到個鐘點, 我就好認真咁講：「不如你走先喇！」佢就仲係度解釋；「我唔知, 我淨係係度抹緊窗, 佢就飛走咗…….」我根本就冇心情聽佢辯解就話：「你走喇, 我唔想見到你！你即刻走！」我連望佢反應既時間都冇, 就帶咗望遠鏡衝咗出門口。

因為聽到話garu向左手面方向飛走, 所以我首先就跑去左面既屋村搵, 一路行一路叫住garu個名, 街坊見到我都用好奇怪既睇神望住我, 我都唔埋得咁多, 見到人就問有冇見過綠色既鸚鵡, 可惜都係渺無音訊, 大約搵咗十五分鐘, 阿sam哥就打電話黎話到咗, 問清楚大約位置後就分頭搵, 再過幾分鐘, sam哥又打黎：「我而家係你屋苑右手面, 我聽到有鸚鵡既叫聲呀！」呢個時候我既心情真係十五十六, 因為我屋苑還住有一位鸚鵡樹既朋友, 會唔係佢隻雀叫呢？當我以最高速度跑到見到阿sam哥, 我就聽到一把好洪亮既鸚鵡叫聲：「呀~~~~~~~」係喇係喇, 我百份百肯定係garu仔叫聲, 位置應該好高, 大約係我右手面既一幢大廈上面，呢個時候遠在荃灣既carolee同empire已經趕到咗, 見到佢哋跳落的士, 神情緊張, 立刻飛奔過黎, 我話：「GARU仔係上面呀！」我哋係咁叫GARU個名, 佢好乖咁即刻大叫返落黎, 聽到叫聲我哋好肯定咁知道GARU係右手面既大廈上面。

我係度大叫GARU之際, 原來屋苑管理處派咗好多位管理員及經理, 攞埋幾個望遠鏡係度幫我手搵GARU, 真係多謝佢哋呀！我相信唔係個個屋苑既管理都可以咁幫手, 真係好好彩呀我！呢個時間agnes帶埋望遠鏡都到埋, 七八個望遠鏡望黎望去都望唔到garu係邊度, 呢個時候sam哥就提議；「我哋分頭洗樓, 每人五層, 逐度門拍！」屋苑既管理人員就唔係好贊成, 怕會騷擾到居民, 正當我哋討論緊搜索方法之際, empire就大叫：「我見到喇，我見到GARU仔喇！」我哋即刻用望遠鏡望, 真係發現GARU仔企係大廈既外牆, 企係一條懸空既橫樑上面, 我本來好冷靜, 但empire一搵到garu , 我就控制唔到自己, 乾涸咗好多年既淚腺已經開始做野, empire真係我哋既幸運女神, 上次街坊唔見雀, 搵咗兩日, 又係俾empire見到, 今次又係empire , 我立刻抱住empire：「又係你, 又係你搵到！」定下神後, 我一數樓層, 原來garu企咗係十七樓外牆橫樑。

作者: sodagreensimon 時間: 2011-6-22 21:01

我立刻塔電梯上十七樓, 陪同我既仲有carolee同empire, 仲有幾個管理員,而sam哥同agnes就係樓下睇實。部電梯一打開, 就見到garu企咗係出面, garu就企係電梯口對出既橫樑上高, 而我哋中間仲隔住塊玻璃, 上面得一排好窄既氣窗, 解釋咗咁耐, 不如睇相會仲清楚。

我一爬上個氣窗叫garu, 佢就即刻行埋黎, 我伸隻手俾佢, 叫佢飛過黎, 本來佢擺好姿勢要飛上黎, 結果望吓下面, 見到好高, 又騰返過去, 唔敢過黎。呢個時候empire就提議不如, 搵啲野食引佢過黎吖, 而管理員又提議不如攞支長木搭出去, 等佢行過黎喇, 所以就分頭行事, empire就拍17樓住戶既門, 問人攞餅乾麵包等食物, 而管理員就立刻去攞咗支好長既地拖棍。我用食物引誘佢, 但係佢好驚, 唔敢過黎, 淨係係條橫樑外騰黎騰去, 而carolee就話唔好伸支地拖棍出去, 怕嚇親佢。同時, mavisweet都已經趕到樓下, 打電話上黎話聽到用食物引佢, 就立刻跑去附近便利店買garu仔最鐘意食既麥包, 而carolee亦通知阿媽, 管理員仲去接我阿媽上黎添！叫咗garu仔好耐, 佢都係眼仔叮叮咁望住我, 唔敢飛過黎, 而阿媽終於趕到, 佢好似我咁爬咗上條石「駁」度叫garu仔飛過黎, 我哋怕佢跌親, 我同carolee係後面扶實佢, 但係garu都係唔敢飛過黎。當時我心係度諗, 不如學街坊「爆剪」喇, 希望消防員黎, 俾我游繩過去抱garu仔過黎, 一邊胡思亂想, 一邊好努力叫garu仔過黎既時候, mavisweet就上到黎, 因為平時佢成日訓練garu仔飛向佢果度, 所以我就即刻叫佢試下, 佢一爬上去, 伸出隻手, 就用一把好冷靜既聲線(但同時我哋都見到佢對腳震過貓王) , 甚至乎係用「喝」既態度同garu講：「garu, 過黎！」garu一聽到佢既指令, 考慮咗唔夠兩秒, 就飛向mavisweet, garu好準確咁降落係mavisweet隻手度, mavisweet一手就捉住佢, 拎咗佢返落黎！！嘩, 終於捉得返喇, 正當大家意為大團圓結果之際, 我阿媽一見到搵返garu, 大叫咗一聲：「哎吔, 搵得返喇…..」雙眼一黑, 全身一軟, 呯啪一聲, 成個暈倒係地下。

此時在旁既carolee眼明手快, 一手托住我阿媽個頭, 一手扶住佢, 但我阿媽實在太重,扶都扶唔住, 就慢慢咁放佢落地下, 而empire就即刻出動佢長備在身, 阿婆三寶中既兩寶--- 白花油同扇, 大家搽油既搽油, 撥扇既撥扇, 而其他人立刻散開, 好讓空氣流通, 大約過咗幾十秒, 阿媽悠悠甦醒, 低聲咁問：「garu呢, garu係邊度呀???」我哋就攞garu過佢俾佢抱住(呢個時候已經上咗腳鏈), 佢抱住garu, 雖然面色蒼白, 但一臉滿足。

等阿媽休息既同時, 樓下既sam同agnes就好心急, 明明見到garu接咗返入黎, 但係點解咁耐都唔落黎既呢？休息咗一陣後, 我哋就扶咗我阿媽落樓下有冷氣既大堂休息, 係呢個時候我先有時間望到咁多位既面容, carolee、agnes同empire早就兩眼通紅, 感動落淚, 而mavisweet同我阿媽對腳仲震緊, sam 就滿心高興, 呢個時候我都忍唔住喇, 淚水直噴 , 大家都抱一團喜極而泣, 而在旁既兩位護衛都忍唔住感動落淚，其中一位一直係搵雀時扶住我阿媽既女管理員仲話；「見到你哋班朋友咁齊心, 又見到你哋咁愛鍚隻雀, 最後搵得返, 真係好感動吖！」
***** NEW 27/06/2011 UPDATE ******
當我哋心情稍為平伏一啲後, 大家就一齊去我屋企休息一陣, 喺呢個時候, 遠在港島返工既CHAICHAI都趕到黎, 我一見到佢就忍佢住要擁抱佢, 多謝佢返緊工都趕黎, 上回講到我打佢俾, 叫佢放工有時間過黎幫手, 點知佢收線後, 立即衝入老細房：「我有緊要事做, 而家要請兩日鐘假, 冇得唔批, 再見！」就即刻飛的黎, 真係十分感動加萬分感謝!!!! 而呢個時候亦開始致電給各位朋友報平安! 而係呢個時候, TEDDY已經印咗大量傳單及街招, 真係辛苦哂佢, 多謝TEDDY~~

(連載完畢)

係呢件事上, 我要多謝好多人, 首先要多謝趕黎幫我搵雀既好朋友, 包括SAM,AGNES,CAROLEE,EMPIRE, MAVISWEET, CHAICHAI, 仲有啤梨及TEDDY印傳單同聯絡, 更要多謝準備黎幫手及關心既好朋友, 包括主席, ONON+EDWARD, 街坊一家, LAWRENCE一家, 大M&大M嫂、寶哥哥、CARMENLUI、SESESE, DUNCAN太多太多, 未能盡錄, 還望見諒, 最後更要多謝GARU, 如果唔係GARU, 我點會認識咁多好朋友, 當初我入黎鸚鵡樹, 真係一個人都唔識架~~

作者: 柑仔b 時間: 2011-6-22 21:15

驚心動魄~快d講埋啦....

作者: 迪迪仔 時間: 2011-6-22 21:30

好彩一開始就睇到來”大團圓搵雀記” 知道最後結果係搵得番，如果唔係我今晚實訓唔著。

作者: ching924 時間: 2011-6-22 21:40

果種感受猶如痛失至親

作者: OnOn 時間: 2011-6-22 21:47

你當時心情, 過來人的我, 完全明白.
你同 Garu 有緣, 由你胆粗粗買一隻未出齊毛的Garu開始.
聽倒揾番一刻, 實在太開心啦!

作者: carolee 時間: 2011-6-22 21:56

喂, 有冇攪錯, 等咗半晚都未有續集?!

作者: sodagreensimon 時間: 2011-6-22 22:19

尋晚公司既工作衝次, 四點先瞓, 俾啖氣呌呌喇~~~

作者: caves2055 時間: 2011-6-22 22:25

我住係慈雲山

作者: GumGum 時間: 2011-6-22 22:43

操響音既鐘點就好輕鬆咁同我講：「你隻雀仔飛走咗！」sodagreensimon 發表於 2011-6-22 21:00

針唔吉到肉唔知痛！！！

作者: zcc411 時間: 2011-6-22 23:04

好彩知道個結果，唔係就擔心死。因為節衷係我的dream bird.
好想快啲睇之後的劇情！！

作者: shairley 時間: 2011-6-23 00:45

雖然知道好結果,但都係

住看過程

作者: layer 時間: 2011-6-23 00:52

返到屋企就好啦~~

p.s.個鐘點永不錄用

作者: BoBoBoBo 時間: 2011-6-23 01:03

雖然知道好結果,但都係住看過程
shairley 發表於 2011-6-23 00:45

住看過程x 2

作者: MandyYung 時間: 2011-6-23 02:23

本帖最後由 MandyYung 於 2011-6-23 02:25 編輯

如果係我個鐘點攪到唔見左Barbie 　我真係即刻叫佢快ｄ扯　費事見到火遮眼　重可以咁輕鬆同我講野　

佢地真係唔知　唔見左隻雀　等同唔見左個仔　ｏｒ　女　

成日係度諗　如果唔見左Barbie 我真係唔知點算　諗下都會眼濕濕　

我已經係can't live without her 　

見到樓主你團圓結果　好替你開心

作者: 養鳥新丁 時間: 2011-6-23 06:26

好彩搵返....

作者: louisa20047 時間: 2011-6-23 08:17

好彩搵得返

個鐘頭唔用腦冇交帶粗心大意之餘
仲要唔知錯

俾著係我
就同佢say bye bye

作者: 養鳥新丁 時間: 2011-6-23 08:22

好彩搵得返
個鐘頭唔用腦冇交帶粗心大意之餘
仲要唔知錯
俾著係我
就同佢say bye bye
louisa20047 發表於 2011-6-23 08:17

鐘點同埋工人....應該可以列入家居危險之一

作者: louisa20047 時間: 2011-6-23 08:30

鐘點同埋工人....應該可以列入家居危險之一
養鳥新丁發表於 2011-6-23 08:22

贊同

作者: BABYPAPA 時間: 2011-6-23 08:44

真情劇習一樣的感動，我喜看這類討論分享，去雀街，罵醫生，這些就麻麻地lor!

作者: 養鳥新丁 時間: 2011-6-23 08:45

真情劇習一樣的感動，我喜看這類討論分享，去雀街，罵醫生，這些就麻麻地lor!
BABYPAPA 發表於 2011-6-23 08:44

笑聲笑聲...滿載溫馨.........

作者: BABYPAPA 時間: 2011-6-23 09:04

23# 養鳥新丁

你就更夠溫情啦，咁多人疼你，帶你去玩，恨死人咩，小丁卅對嗎？遲些我BABY 伯伯也帶你玩金剛仔好無...

作者: louisa20047 時間: 2011-6-23 09:08

23# 養鳥新丁

你就更夠溫情啦，咁多人疼你，帶你去玩，恨死人咩，小丁卅對嗎？遲些我BABY 伯伯也帶你玩金剛仔好無...
BABYPAPA 發表於 2011-6-23 09:04

玩金剛仔
新丁會中毒

作者: Ringo0816 時間: 2011-6-23 09:51

我一定會叫個鐘點聽日唔駛返!!!!

作者: mavisweet 時間: 2011-6-23 10:12

真係諗起都想喊....

今次事件發生,感受到既係滿到瀉既人情味~

作者: 風中飛鸚 時間: 2011-6-23 10:22

操響音既鐘點就好輕鬆咁同我講：
鄉

而大廈後則係茂密叢林
側

我發現到阿媽披頭 X 髮
散

作者: mavisweet 時間: 2011-6-23 10:31

最多錯別字既主席係度捉人錯別字!!

作者: ching924 時間: 2011-6-23 10:33

最多錯別字既主席係度捉人錯別字!!
mavisweet 發表於 23-6-2011 10:31 AM

天理何在

作者: 風中飛鸚 時間: 2011-6-23 10:34

當時我正在9樓外牆棚架工作~收到街坊電話~問是否SIMON走左GARU?我說:不知道~你為什麼這樣說?
街坊話見到鸚鵡樹有個POST~慈雲山走失節衷~我當時立即知道不妙~打電話回公司~知道又已經變成緊急聯絡中心~我立即破口大罵~有冇攪錯丫~叫緊大家要小心~走雀會害到朋友架嗎~
我第一時間想~今晚冇得健身~明早冇得游水~極之唔開心~工作又非常忙架~街坊問我幾時走得~
我答:個招牌吊到一半~起碼吊左上去~裝好都要半小時~我先可以離去~我有駕駛私家車~我走得先聯絡啦~
點知街坊已經CALL的士啦~到我走得就收到消息搵番啦~
我仲話咁快架~搵耐D丫嗎~等我去剷到佢飛起~咁唔小心~走雀老馮搵得番丫~
走雀就等於大海撈針~冇乜機會架~

作者: 風中飛鸚 時間: 2011-6-23 10:47

一般搵雀分兩個階段~第一就係要先見到蹤影~第二先係想辦法捉~通常第一階段最難~
我去搵雀無數次~知道要搵到蹤影~就要跟足線索~推理機會率~將目標位置收窄~
細緻去搵~唔好粗略將望~
而走雀期間~最慘係無辜朋友~佢地自己小心鎖好自己隻雀~但都要去搵雀~
不過我搵左咁多年~已經知道~搵到就好彩~搵唔到就應該~

作者: ching924 時間: 2011-6-23 10:48

好驚心動魄

作者: sodagreensimon 時間: 2011-6-23 10:51

操響音既鐘點就好輕鬆咁同我講：
鄉

而大廈後則係茂密叢林
側

我發現到阿媽披頭 X 髮
散
風中飛鸚發表於 2011-6-23 10:22

1. 第一個你啱
2. 第二個的確係「則」
3. 漏字

多謝提醒

主席, 俾條生路行吓喇,果日掛住搵雀冇做野. 攪到前晚四點幾先瞓, 尋晚一路打字一路恰眼瞓, 最後攬住個keyboard瞓着咗~~

作者: mmchu 時間: 2011-6-23 11:04

撞鬼，睇到我都眼濕濕！
。・°°・(＞_＜)・°°・。

作者: BoBoBoBo 時間: 2011-6-23 11:10

本帖最後由 BoBoBoBo 於 2011-6-23 11:17 編輯

呢排乜雀都出走, 好邪! 連Garu 都出事, 睇到我都心驚驚!

今朝掛住新post 出走那隻葵花, 太陽一出就去幫手落街望望, 才知到搵雀真係好難, 絕對等於大海撈針!

Simon 快d 講埋落去啦!

作者: carolee 時間: 2011-6-23 11:11

果日我同empire坐緊的士去搵雀，諗到如果搵唔garu仔，來緊又打風，唔知點算，已經大家都眼濕濕

作者: ching924 時間: 2011-6-23 11:45

哇!!伯母冇事丫ma

作者: 風中飛鸚 時間: 2011-6-23 11:51

果日我同empire坐緊的士去搵雀，諗到如果搵唔garu仔，來緊又打風，唔知點算，已經大家都眼濕濕
carolee 發表於 2011-6-23 11:11

我諗起晚上冇得健身~明早冇得游水~都一樣眼濕濕

作者: rainny 時間: 2011-6-23 12:24

真係好彩搵得返!!!!!
伯母應該都係太緊張唔舒服~~ 休息O下都應該好返O的??
我都走過雀... 喊O左幾日...
不過我屋企個工人姐姐仲傷心過我~~
佢好鍾意鸚鵡~~ 以前O個隻飛走O左之後~ 隔O左一輪~ 佢問我可唔可以再買返同一個品種O既...
我隔O左三年先買而家O既細D~ 細D鍾意工人姐姐仲多過我~~ HAHA
無計... 我要返工... 工人姐姐成日O係屋企~ 細D對佢O既時間多過對我... ^^
所以都唔係個個工人都咁唔小心~~ 咁唔愛惜小動物!!

作者: GumGum 時間: 2011-6-23 12:43

好感動！
Garu仔真係好彩，有咁多朋友愛錫佢！
搵得番真係一種福氣和緣份。

作者: 養鳥新丁 時間: 2011-6-23 12:47

23# 養鳥新丁

你就更夠溫情啦，咁多人疼你，帶你去玩，恨死人咩，小丁卅對嗎？遲些我BABY 伯伯也帶你玩金剛仔好無...
BABYPAPA 發表於 2011-6-23 09:04

係咪真架?......恨左好耐了

作者: 養鳥新丁 時間: 2011-6-23 12:48

哇!!伯母冇事丫ma
ching924 發表於 2011-6-23 11:45

作者: 芳姨 時間: 2011-6-23 12:59

睇到我胆顫心驚,一路睇一路眼濕濕,好彩搵得番,

睇到搵番個一刻真係感動到喊,

幾年前我也走失隻大白葵,三日後有人打電話給我搵番,
當我見番佢個一刻,感動到喊,啲人問隻雀係咪好貴架,我喊到冇答佢,

伯母真係好錫garu,保重身體休息吓啊.

作者: louisa20047 時間: 2011-6-23 13:21

睇到我都想哭啦

作者: ngkare 時間: 2011-6-23 13:38

睇到伯母ge反應時, 想起當日唔見第一隻雞尾時, 我亞媽d情況, 一路睇一路喊...!
點都好, 搵番就得啦!
噚日大風大雨, 我都成晚諗住e拜d失雀同心好刀割的主人們, 大家加油!

作者: 風中飛鸚 時間: 2011-6-23 13:43

咁多人話睇到眼濕濕~我去睇左之後~都覺得好感動~如果SESESE之流睇左~一定變豬頭~

作者: mavisweet 時間: 2011-6-23 14:16

終於講完個連續劇啦~

我都可以講下我個日既感受啦~
個日下午番緊工收到simon電話,聽到garu飛走左,
嚇到手都震埋,即刻打比老闆同佢講"我屋企人有事,我要請半日假!!"聽到佢講"ok!"同佢講左句"唔該曬!"cup線走人,極速跑出公司搵的士~其間上網睇下有咩消息,又聯絡其他人~

一去到,已經見到平台上好多人向樓上望,一跑過去個掃地嬸嬸問我"你又黎搵雀呀??"
我答:"係呀!係邊呀?"佢指一指話係哩棟樓上面,我向上望咩都見唔到~
當時simon佢地已經上左17樓望住garu,我亦同時見到agnes佢話要買面包引garu番黎,二話不說跑去隔離村買面包又跑番過黎,一路心諗:"garu你千祈要企定定等我d面包黎~"

跑番到樓下知道simon媽媽已經拎左面包上去引garu,我亦都一支箭咁衝入大廈,管理員一見我癲婆咁衝入去就指住左面同我講”哩邊17樓呀,快d上去啦~!”

搭lift其間,諗番起前一日先同garu玩指令飛上我手, 唔洗玩具食物引佢,佢每次都可以好準繩地飛上我手到,所以我直覺同我講,佢今次都會聽我指令飛番黎~

一打開lift門,已經見到好多管理員都好熱心咁睇下有咩辦法幫我地,而simon媽媽亦爬左上去伸左隻手出氣窗,拎住garu最愛既面包想引garu番黎,garu望住面包想飛想飛,但又唔敢飛,我好冷靜爬上去,伸左前臂出窗,好堅定咁望住garu,叫左一聲”garu!”,當我見到garu望住我既一刻,我用右手拍一拍左手前臂示意佢飛上黎,同時叫”garu,come!”…..garu諗左一陣望實我隻手,就一拍翼好準確咁飛左上我隻手上面啦~

之後既事就同simon講既一樣,個個落到大堂又喊又笑,好似傻左咁,連管理員都喊埋一份,個個見到我地搵番都好鄧我地高興,完全感受到所有人既愛同人情味~

整個過程由simon發現garu失縱到搵番都只係一兩小時內既事, 真係非常之好彩~!!

而當garu番到屋企係完全無受驚既反應,反而好開心咁入籠飲水~食野~仲一d都唔”支力”~
反而我地成班人係比佢嚇到好”支力”…

作者: joejoe 時間: 2011-6-23 14:37

"喊到呼天搶地：「GARU飛走咗喇, 冇喇冇喇, GARU飛走咗喇, 我當佢係第二個仔黎架, 會唔會搵得返架? 人哋話會飛返屋企架…………….」真係聞者傷心, 聽者流淚, 心痛死我。"
so touching.....

hope auntie takes good care.

I lost my parrot three years ago so I can understand your feeling and great worry.
fortunately, OnOn and 風中飛鸚 help me to find my parrot.
Really appreciate OnOn & 風中飛鸚 unconditional love.......

作者: clymcm 時間: 2011-6-23 14:39

好感動
每個角色都充分表現出重要性, 團結力量真可愛!

幸運女神 Empire 我都想攬下你~
仲有 Mavisweet,

繼續做野先

作者: ChaiChai 時間: 2011-6-23 15:09

Simon: 你可以出書啦真係寫得好好, 我亦深深感受到~ 好彩平時Garu仔訓練有素

作者: hamic 時間: 2011-6-23 15:26

睇到眼濕濕... 今次真係唔單止做朋友兩脇揷刀, 連管理員都咁熱心, 真係好開心感動~

作者: 燉雪梨 時間: 2011-6-23 15:34

一路睇一路感動到眼濕濕,

好開心garu仔揾得番, 又好感動一班雀友咁齊心, 咁團結！

最後要教個鐘點睇清楚garu仔在籠內先好抺窗, 又或放garu仔出來玩時要同個鐘點講唔好抹窗住...

作者: carolee 時間: 2011-6-23 15:38

特別佩服EMPIRE, 佢一定係外星人, 天地茫茫, GARU仔咁細粒佢都一眼搵到佢出來

作者: 小達摩 時間: 2011-6-23 16:24

看完了結局
恭喜恭喜! SIMON!
Garu好靚，靚到有D似假既雀仔公仔
佢個嘴好巨型，俾佢咬一咬，會唔會手指都甩?
另外，你係唔係前兩日跟我講電話的那一位，如果係，真係唔該你和主席。

作者: caves2055 時間: 2011-6-23 17:05

剪左翼???

作者: sesese 時間: 2011-6-23 18:46

真的睇到淚如泉湧

我們能在鸚鵡樹下結識是一種很厚的緣份, 相信大家會珍惜這份友情.

作者: 啤梨 時間: 2011-6-23 19:22

樓主未講呀~~~~~~~

各位慾知後事如何,
請靜待樓主再描述啦

作者: 啤梨 時間: 2011-6-23 19:46

55# 小達摩

係呀~ 係佢呀~

作者: 啤梨 時間: 2011-6-23 20:29

真係好感動,有一班咁熱心、咁關心、咁有義氣既朋友真係好難得呀,另一方面又好擔心Simon 媽既身體,
當日Simon 打電話俾我話 Garu 唔見咗, 果刻真係唔肯相信,
跟著淨係諗依個時間( 下午3:00 ) 有邊個可以幫到手, 就盡量打電話俾人, 叫人幫手,
整街招, 當日呀cool 黎我舖找我地, 但由於太緊急都無理到呀cool 兄同cool姐tim,
真係唔好意思呀~~~

今次又一次發揮 :
樹樹精神,
救雀助人,
分秒必爭,
堅毅過人.................

作者: bb4321 時間: 2011-6-23 21:26

感動+高興

作者: ching924 時間: 2011-6-23 21:27

樹樹精神,
救雀助人,
分秒必爭,
堅毅過人
啤梨發表於 23-6-2011 08:29 PM

救雀12真言!

作者: 迪迪仔 時間: 2011-6-23 21:45

好彩伯母無事。佢真係當左garu係佢個仔一樣咁緊張。我個鐘點都試過d雀係度飛，佢就係度開窗，真係想殺L左佢。

作者: kitkit441 時間: 2011-6-23 21:50

作者: OnOn 時間: 2011-6-23 23:02

樹樹精神,
救雀助人,
分秒必爭,
堅毅過人
啤梨發表於 23-6-2011 20:29

作者: OnOn 時間: 2011-6-23 23:05

再睇番個過經都非常感動,
亦好開心見倒一家團聚.

作者: 芳姨 時間: 2011-6-23 23:22

再一次見證 Empire 是幸運女神,
有特別過人之處.

作者: 藍妹 時間: 2011-6-23 23:32

走雀的心情!想起都怕怕!好彩最後一家團聚

作者: jennymok 時間: 2011-6-23 23:57

走雀的心情我哋最明白, 06年我們的葵花 "壽包" 跟外面的葵女飛走咗 !
見倒能夠一家團聚. 好開心 , 好感動

作者: Empire 時間: 2011-6-24 01:15

睇完simon & mavis 描述當日Garu仔飛走及揾得番大團圓結局, 真係好感動! 我都係一路睇一路眼濕濕!
等我又講吓當日嘅感受先~

星期一天氣炎熱, 陽光非常猛烈! 下午2點幾係九龍塘與朋友食完午飯,就坐港鐵到荃灣站, 行咗十分鐘到達了荃灣大會堂,已經成身汗,心裡想著:好喇!好喇!可以係有冷氣的課室舒舒服服上堂學唱粵曲,唔駛係條街到, 熱死喇!
3點18分在大會堂2/F電梯內收到Teddy的電話, 佢話:聽唔聽到!聽唔聽到! 我就話:聽到! 佢就再講: 急事!急事!Garu仔飛走咗! 即刻去幫手! 我話:好! 就收咗線! 即時電話又再響起來, 是simon打來的! 我跟simon說:我知道了! 我同carol即刻黎! 又再收咗線! 我急忙的走入課室,當時老師和同學已經開始唱起歌來了! 我走到carol身邊說:無得唱喇! Garu仔飛走咗! Carol當時都十分愕然!本來想唱完一小段先離開, 驚怕打擾了其他同學, 不過我倆都心不在焉! 都是速走為妙! 然後跟老師說好朋友的鸚鵡飛走了, 我們要去幫手揾雀! 走出大會堂後, 係馬路中心叫停咗架的士, 跟司機講: 唔該去慈雲山山頂~

Simon真係住在慈雲山山頂, 39/F, 背山面海! 我和caro坐緊的士時, 想到如果揾唔番Garu仔, 就慘喇! 星期二會開始有雨又就黎打風, Garu仔又咁乖, 唔見咗就.......主人同雀雀都好慘喇! 心痛到不得了~
Simon屋企環境又非常空曠, 揾得番嘅機會都幾難...............
兩個人係架的士內已經講到眼濕濕~雙眼通紅~都唔敢再講落去~都唔敢再想落去~

去到simon屋村樓下, 一落的士就見到simon&sam哥, 佢吔話聽到Garu仔叫聲, 係呀係呀! 真係鸚鵡叫聲! 當大家鎖定及相討洗樓時, 我就行遠一些, 想細心遠望每層的窗口有沒有Garu的踪跡, 一路望,一路想, Garu仔收d出現啦~ 快d出現啦~你嫲嫲(即是Simon媽媽) 好掛著你呀! 好擔心你呀! 你唔好要佢咁擔心啦! Garu仔你快d出現啦! 當時自己嘅淚水都控制唔到,不停咁留! 望到17/F, 真係唔敢相信, 我見到, 我見到Garu仔啦~當時真的好開心, 好激動, simon即時哭成淚人~ 真係見得番Garu仔呀~真係見得番Garu仔呀~

其實我唔係好好眼咋, 我有400度近視, 100度老花添!
見得番Garu仔, 都係Sam哥好耳, 聽到Garu仔叫聲!
也全靠大家好朋友的念力, 及Garu仔和Mavis&Simon一家人的緣份!

多謝各位~

作者: MandyYung 時間: 2011-6-24 01:49

睇到結局個part 　我都睇到眼濕濕．．．．．．　可以重逢　真係太好拉　
有時望住隻愛鸚　～　Barbie 都係度諗　將來有日我地會死別　心裡就好痛苦　
所以更要珍惜一齊既日子　

平時我只係知一唔見雀　樹樹ｄ雀友會幫手搵　好熱心　

但今次睇晒成個過程　真係好感動　亦好開心可以黎到樹樹呢度　因為呢度比人有好warm 既feel

我想唔單止樓主　樓主既媽媽　即伯母　如果搵唔返　真係唔知點算　．．．．．．

而家搵得返　yeah !

作者: cheerios 時間: 2011-6-24 03:05

大團圓，可喜可賀

作者: cool 時間: 2011-6-24 03:26

大團圓，可喜可賀 X N
那天見啤梨快速做街招真是利害,不能幫手真不好意思,

作者: sodagreensimon 時間: 2011-6-24 08:26

我仲未講完架~~ 等等~~~~~~~~~~~~

作者: carolee 時間: 2011-6-24 08:41

睇完simon & mavis 描述當日Garu仔飛走及揾得番大團圓結局, 真係好感動! 我都係一路睇一路眼濕濕!
等我又講吓當日嘅感受先~

星期一天氣炎熱, 陽光非常猛烈! 下午2點幾係九龍塘與朋友食完午飯, ...
Empire 發表於 2011-6-24 01:15

好感人, 做乜你哋個個D文筆都咁好嫁?

作者: carolee 時間: 2011-6-24 08:42

我仲未講完架~~ 等等~~~~~~~~~~~~
sodagreensimon 發表於 2011-6-24 08:26

吓?! 仲有嘅咩? 咁快D講埋落去啦!

作者: carolee 時間: 2011-6-24 08:45

樹樹精神,
救雀助人,
分秒必爭,
堅毅過人

啤梨E首打油詩超好!

作者: miumiu 時間: 2011-6-24 09:03

好彩搵得返

作者: sallyyau 時間: 2011-6-24 10:07

大團圓

HAPPY ENDING

作者: louisa20047 時間: 2011-6-24 10:51

樹樹精神,
救雀助人,
分秒必爭,
堅毅過人啤梨發表於 2011-6-23 20:29

作者: MandyYung 時間: 2011-6-24 11:00

樹樹精神,
救雀助人,
分秒必爭,
堅毅過人

啤梨E首打油詩超好!
carolee 發表於 2011-6-24 08:45

講得好好呀　！　

作者: 風中飛鸚 時間: 2011-6-24 11:05

我已經去政府註冊左幸運女神經理人~如需協助搵雀~請聯絡"幸運女神經理人有限公司"提防假冒~
因為最近有一名女子~樣貌娟好~冒認本公司職員~什至聲稱是幸運女神真正經理人~大家唔好信佢~(信我)
收費詳情~請參閱無線電視8點半特別節目~由香港電台電視部製作~"幸運女神的傳奇一生"
更可以在城市售票處買DVD~附送主席的傳奇一生連畫冊"

作者: louisa20047 時間: 2011-6-24 11:16

我已經去政府註冊左幸運女神經理人~如需協助搵雀~請聯絡"幸運女神經理人有限公司"提防假冒~
因為最近有一名女子~樣貌娟好~冒認本公司職員~什至聲稱是幸運女神真正經理人~大家唔好信佢~(信我)
收費詳情~請參閱無線電 ...
風中飛鸚發表於 2011-6-24 11:05

作者: YVONNE 時間: 2011-6-24 11:37

真係好開心，恭喜晒Simon, 我諗我地一班走過雀，又失而復得嘅雀友，真係可以出番本書，鼓勵下失雀但尚未有我們一樣幸運的朋友，以後請工人，入門首件事就係聲明不可擅自開窗

作者: J-son 時間: 2011-6-24 12:07

冇事就好, 好彩搵番雨過天清~

最終關鍵係Garu識聽指令飛返上手
我覺得冇剪翼既鸚鵡哩個訓練真係唔慳得, 我自己d鸚鵡冇剪翼, 怕有日非自己控制下走雀, 所以每日都會玩高處或低處聽指令飛3~4米上手, 未雨绸缪~

作者: carmenwong 時間: 2011-6-24 12:56

好感動呀!小寶以前都走過,揾了一晚第2朝先揾得返,唔見左佢果一刻真係好驚好亂

作者: 風中飛鸚 時間: 2011-6-24 14:07

１樹樹打咁多字～唔係鬧人講事非都咁多人睇～真特別～

２下次聚會～幸運女神唔洗食野～攬就飽啦～

３短短半個鐘～有咁多角度睇件事～証明大家冇講大話～口供一致～

作者: icecream215 時間: 2011-6-24 17:14

恭喜哂你揾返個仔
完全睇到人眼濕濕

作者: MandyYung 時間: 2011-6-26 01:37

看完了結局
恭喜恭喜! SIMON!
Garu好靚，靚到有D似假既雀仔公仔
佢個嘴好巨型，俾佢咬一咬，會唔會手指都甩?
另外，你係唔係前兩日跟我講電話的那一位，如果係，真係唔該你和主席。
小達摩發表於 2011-6-23 16:24

而家先留意度　佢原來食緊榴槤　　原來鸚鵡可以食榴槤　　咁吸蜜鸚鵡係米都食得呢

作者: 1a2b3c 時間: 2011-6-26 02:13

大團圓

作者: lunz 時間: 2011-6-26 10:59

作者: sodagreensimon 時間: 2011-6-27 22:46

真係多謝咁多位朋友關心~~

作者: lawrence 時間: 2011-6-27 23:56

大團圓~好開心

Empire好叻~

by Pheona

作者: CARMEN-LUI 時間: 2011-6-28 11:40

你呢個POST我一路睇,一路喊又一路笑~~~

作者: BoBoBoBo 時間: 2011-6-28 12:52

本帖最後由 BoBoBoBo 於 2011-6-28 12:54 編輯

Empire & mavisweet~~~

作者: agnes283 時間: 2011-6-28 19:00

其實個日我都係剛剛返到屋企, 正當我準備做家務時, 突然接到Simon電話, 話garu仔飛走左, 而背後就只聽到一把喊得好悽厲既聲音, 就係Simon媽咪, 於是我立刻放下手頭上既野, 用最快速度放少少糧比D鸚鵡食, 因為個朝一早去左陪媽咪飲茶, 所以個糧杯係冇雀糧.
跟住我就急步走去搭的士, 希望爭取時間去到現場, 但當時個心情就好似自己唔見左隻雀一橡, 因為有一段時間幫Simon照顧過garu仔, 我同Simon既養法一樣, 如果我係屋企, 我就會放晒D雀出黎, 所以garu仔係我屋企都係咁, 佢好懂性, 佢好似知道我係會照顧佢, 所以每次佢都會飛黎我個度, 而唔會飛去我家裹其他成員, 而我隻灰鸚又會成日叫住garu garu, 所以當時個心都沈左落去.

作者: sesese 時間: 2011-6-28 19:03

真係好開心，恭喜晒Simon, 我諗我地一班走過雀，又失而復得嘅雀友，真係可以出番本書，鼓勵下失雀但尚未有我們一樣幸運的朋友，以後請工人，入門首件事就係聲明不可擅自開窗YVONNE 發表於 2011-6-24 11:37

比你笑死啦 yvonne

作者: sesese 時間: 2011-6-28 19:05

睇完 empire 既描述真係忍唔住

作者: agnes283 時間: 2011-6-28 19:34

其實當時去到屋苑附近, 我就開始留意D樹上有冇garu仔D踪影, 點知行到屋苑前面已經見到有幾個路人甲係咁向上望, 心諗一定係見到garu仔, 跟住再問D實Q佢哋話見到隻雀, 當時見到阿Sam佢指比我睇garu個位置, 見到之後心情先至稍為放鬆, 跟住Mavis上埋去引到garu仔飛過去先至放下心頭大石. 不過見到Simon媽咪為咗隻雀有點近乎失控, 我個心都好痛, 相信只有我哋養過雀嘅人先至會明白, 其他人可能已經話我哋係傻嘅.
其實順帶一提就係個度D實Q都好好, 不停問我哋需要乜嘢就開聲, 好肯幫手, 佢哋完全冇歧視D鸚鵡, 實在難得!更重要就當然係Empire同Carol, Sam, 因為佢哋放低晒手頭上嘅嘢趕嚟, 即時發揮互相幫忙嘅精神!

歡迎光臨 PARROT-TREE (http://forum.parrot-tree.com/)