PARROT-TREE - Powered by Discuz! Board

標題: 求助咬毛 [打印本頁]

作者: 迪迪仔 時間: 2012-3-16 22:05 標題: 求助咬毛

想大家分享一下午我宜家應該要點做。。。

希望大家仲記得迪迪仔。早幾年佢已經開始有咬頸毛的問題。每當佢咬晒條頸d毛之後面，過一排會生番出黎，過一排又再咬過。近排佢表現到成日好痕咁。特然r下里度又r下果度，好似俾野咬咁。咁之後我就去左雀街買去蝨水同佢噴身體及不時同佢沖涼。但係情況無咩進展。

直到上星期五晚上，可怕的事終於出現啦。我一返到屋企，竟然成地毛，情況係好似隻雀俾隻貓食左咁，之後一睇，迪迪身上的羽毛無晒，而每條毛的尾端無左毛筒最尾果段，相信係咬斷左。而迪迪的反應仲係成身好痕。

第二日即星期六下午，我即去雀街買內服去虫水返去俾迪迪食。食完到宜家，佢仲係每日都覺得好痕咁係咁r痕。接而家只食左一次，因為說明書話第一次後的第二個星期先食第二次。之後六個月後再食。

請大家俾d意見我國我宜家應該要點做好。因為佢成日都好痕跡仲係度咬緊毛。

里張係迪迪今晚的照片

里張俾噴身(大支）同內服（細支）的藥。

作者: hahalegolas1991 時間: 2012-3-16 22:10

想問下迪迪仔咬毛有無季節性? 我有個朋友o係海洋公園做o架, 佢地有隻折衷女一到冬天就會除衫, 夏天又會咩事都無 (本身佢係健康o既, 唔知點解會咁啦)

作者: 風中飛鸚 時間: 2012-3-16 22:11

因為咬毛成因有好多~

作者: hahalegolas1991 時間: 2012-3-16 22:14

因為咬毛成因有好多~
風中飛鸚發表於 2012-3-16 22:11

咁可能佢享受好凍o既感覺!

作者: 迪迪仔 時間: 2012-3-16 22:19

佢咬條頸就唔定時間咬開要咬光佢先安樂，係後頸長期無毛。佢成身咁咬發都係第一次。

作者: 迪迪仔 時間: 2012-3-16 22:21

迪迪資料。下個月6 歲。折衷仔。一到發情期就會大叫做同日日都要捉住我隻手搞搞震。宜家應到佢發情期的尾聲。以往發情唔會咁咬毛法的。

作者: 迪迪仔 時間: 2012-3-16 22:25

因為咬毛成因有好多~
風中飛鸚發表於 2012-3-16 22:11

所以我宜家頭都爆埋。。。。過去幾個月間屋環境無變。係多左棵桃花，但係佢唔怕，仲會企係旁邊個企架度。貝貝同迪迪好間唔時會咬桃花的樹支，但貝貝又唔會咁咬法。

作者: hahalegolas1991 時間: 2012-3-16 22:27

我諗而家最緊要都係做好保暖, 唔好比佢凍親... 之後再睇睇佢最近發生咩事... 食o野o個啲有無特別問題??

作者: 迪迪仔 時間: 2012-3-16 22:37

前幾日得12度，我就俾佢上床訓，因為暖d。
里幾日唔多開窗，怕佢凍。

食物應無事。呀折女貝貝都係食相同的野，又住埋同一個籠。

作者: hahalegolas1991 時間: 2012-3-16 22:43

前幾日得12度，我就俾佢上床訓，因為暖d。
里幾日唔多開窗，怕佢凍。

食物應無事。呀折女貝貝都係食相同的野，又住埋同一個籠。
迪迪仔發表於 2012-3-16 22:37

如果佢食o野ok, 又精神, 咁應該唔洗太擔心o既~ 學主席話齋, 有時佢地係要咬, 你阻都阻唔住, 始終到毛都係佢o既...

睇下需唔需要要開加溫器材啦~ 因為佢無毛, 實會怕凍啲o架啦, 就算我地唔覺凍, 佢都可能會凍親丫~ 加o係一個角落, 佢凍自然會走埋去, 熱佢應該會識走開...

作者: sodagreensimon 時間: 2012-3-16 22:54

GARU 一樣係咬毛, 咩都做哂, 我都灰哂心, 唯有當佢灰鸚咁養~~

作者: louisa20047 時間: 2012-3-16 23:40

咬得咁急咁快~會唔會係吞左金屬?

作者: louisa20047 時間: 2012-3-16 23:43

營養太多會身痕~
發情期~日光,溫度,伴侶,其他雀等都有影響

作者: 金莎朱古力 時間: 2012-3-16 23:51

我細路果只灰嬰，冬天咬毛，夏天出毛，每年如此。找唔到原因，佢地習慣左，唔再去找原因。順其自然，可能主人會開心D．

作者: 養鳥新丁 時間: 2012-3-17 00:32

嘩!受左咩刺激

作者: ECKO 時間: 2012-3-17 01:09

其實小沖涼都是一個原因。

作者: OnOn 時間: 2012-3-17 01:23

聽講晒太陽都會有幫助.
咬毛呢家野...........好難攪

作者: Louis 時間: 2012-3-17 09:28

可能係季節轉變開始換毛或因為進入繁殖季節受荷爾蒙影響, 可以的話, 見下醫生, 或需要處方藥物輔助治療, 例如: 止痕抗敏藥物, 鎮靜劑或抑制荷爾蒙藥物等.

作者: 風中飛鸚 時間: 2012-3-17 10:35

現時醫治鸚鵡咬毛最有效辦法~就係用一個罩~

將主人眼睛罩住~

作者: 養鳥新丁 時間: 2012-3-17 10:36

現時醫治鸚鵡咬毛最有效辦法~就係用一個罩~

將主人眼睛罩住~
風中飛鸚發表於 2012-3-17 10:35

眼不見為淨大法

作者: 迪迪仔 時間: 2012-3-17 10:41

好多謝大家的意見.  其實沖涼佢都經常沖. 因為每日我去洗白白時都會帶埋佢, 佢想沖涼時就會走埋黎一齊沖.
至於晒太陽方面.. 平時約1-2個星期都會帶佢落街晒太陽.  但係里個月... 唔好話佢地.. 就連我都無得晒.  唔係陰天就係大霧或落雨.. 希望太陽快D出黎啦.. 等大家連人帶雀一齊去晒太陽..

好多謝LOUIS 的意見.. 我都諗緊要唔要帶佢去睇E生... 記得幾年前佢咬毛. 我就帶佢去睇E生. 但係果時E生話係情緒問題多. 無藥可幫助.
但係今次我見佢痕到死係咁咬. 所以我諗情況未必同上次一樣. 但係又心大心細唔知睇E生好定點.  不過聽完你咁講後. 如果因為咁真係有藥幫下佢, 即使係止下痕都好. 咁我會去睇呀.. 咁當然. 我會明白, 一切要睇下E生親眼視察過迪迪的情況後先作準.

作者: 迪迪仔 時間: 2012-3-17 10:43

係wow. garu 佢點呀.. 咬毛情況利害嗎？

作者: 迪迪仔 時間: 2012-3-17 10:50

19# 風中飛鸚

我想俾個讚好... 但係無里個function...

作者: 迪迪仔 時間: 2012-3-17 10:52

岩岩book左睇大圍e生.. 好鬼貴.. 要520.. 睇only... 未計藥錢...@.@

作者: ping 時間: 2012-3-17 12:48

不如問埋銅鑼灣，我兩年前睇，診金250，計埋葯，埋單千多。

作者: 迪迪仔 時間: 2012-3-17 13:00

25# ping

能否提供更詳細的資料呢？E.G TEL # & SHOP NAME. THX

作者: BABYPAPA 時間: 2012-3-17 17:06

痕都好辛若的，我的灰鸚都無乜冲凉的！冲得多㑹否不好呢！

作者: carolee 時間: 2012-3-17 17:44

http://www.millbryhill.co.uk/bir ... -oro-bath-29734.htm

我最近在鸚有盡有買了這款bath salt，說可以：

Special bath salts for glossy plumage
Makes feathers more supple,
Keeps the feet and skin free from scaling,
Ensures glossy feathers,
Has a relaxing function (relaxes the muscles),
Cleans the skin and feathers.

令皮膚滋潤d放鬆d，小雲都好鍾意（因佢一想生旦就會咬碎毛），用咗好似冇見佢再咬毛，妳pm我，俾d妳試下同迪迪仔沖涼

作者: OnOn 時間: 2012-3-17 19:23

希望可以揾出身痕的原因....快D好番.

作者: yimaggie 時間: 2012-3-17 21:47

上次我帶必必去土瓜灣睇傷風....診金260...2星期藥埋單$3xx

作者: 迪迪仔 時間: 2012-3-17 21:57

痕都好辛若的，我的灰鸚都無乜冲凉的！冲得多㑹否不好呢！
BABYPAPA 發表於 2012-3-17 17:06

聽聞多羽粉的鸚鵡唔洗成日沖涼.. 因為佢地就係用里d羽粉拎佢地乾正. 越多羽粉越健康. 反而成日同佢地沖涼沖晒d粉就仲大鑊.

不過我又覺得唔同佢沖涼又唔得wwo... 適可而止啦

有錯請指教...

作者: 迪迪仔 時間: 2012-3-17 21:57

28# carolee

都好wow.. thx...

作者: ping 時間: 2012-3-17 21:59

26# 迪迪仔

Causeway Bay Animal Hospital
25-27 Whitfied Road, HKG
2510 0836

作者: 迪迪仔 時間: 2012-3-17 22:00

28# carolee

sorry 原來send 唔到pm...請問可以點拎呢？

作者: 迪迪仔 時間: 2012-3-17 22:19

今日去左大圍睇..由就就咁睇唔知迪迪係情緒問題定係身體問題.. 咁如果想sure d係咩問題的話就要麻醉後做xray 同驗血.. 為左得個明白同check下佢身體情況.... 菏包痛d都要la.. 洗左成個月零用黎同佢做里d checking.

血液報告有d低過要求, 又有d高過要求, 又有d 正常.  但係都唔係拎到迪迪咬毛同身痕的reason.
睇埋x-ray 大致上一切正常  係個脾臟俾正常大小小. 沙"狼" d 沙的黑白影比較光d之後其他都一齊正常.

簡單d講.. 佢身體都叫做健康.. 唔係因為身體問題而走去咬毛.

所以宜家為有主力睇番係佢情緒問題.  而情緒問題就係主人同雀鳥之間都有問題.  食物, 環境, 濕度, 人與雀之間的互動行為.  所有野都要重新去整理好.

另外.. 醫生睇過我俾迪迪用的藥物後.. 佢就話.. 其實我唔應該俾里d藥佢. 原因係.
1) 噴藥.  我地用肉眼都見唔到佢身有蝨, 所以唔應該用里d藥
2) 內服藥. 迪迪的表現並唔係因為有虫係身內點咬而搞到身痕. 所以唔應該食里d藥..
即係我自已用藥唔正確..

宜家e生新開左10日藥每日3次俾迪迪..  1隻係抗敏感.. 另1隻係消炎止痛

仲有一樣好重要的野係.. 原來我地成日用手掃佢地背脊里個行為.. 係雀鳥黎講.. 我係度調戲緊佢...里個行為對佢地唔好.. 因為我地終極都唔會係佢地伴侶..  所以里個壞習慣我要介左佢.. 只可以摸頭摸咀.. 唔好摸身..

作者: 迪迪仔 時間: 2012-3-17 22:20

26# 迪迪仔

Causeway Bay Animal Hospital
25-27 Whitfied Road, HKG
2510 0836
ping 發表於 2012-3-17 21:59

thx a lot

作者: vanessachan 時間: 2012-3-17 23:01

2年前帶隻雀去睇dr.tiger,診金都係$290....嘩.咁快就加左一倍有多.原來不能隨便掃雀雀背脊

作者: 迪迪仔 時間: 2012-3-17 23:12

2年前帶隻雀去睇dr.tiger,診金都係$290....嘩.咁快就加左一倍有多.原來不能隨便掃雀雀背脊
vanessachan 發表於 2012-3-17 23:01

係.. 之前我都係睇290.. 不過時間真係短過今日好多... 今日睇e生同佢傾都差不多傾左1hr

作者: louisa20047 時間: 2012-3-17 23:23

2年前帶隻雀去睇dr.tiger,診金都係$290....嘩.咁快就加左一倍有多.原來不能隨便掃雀雀背脊
vanessachan 發表於 2012-3-17 23:01

翼底都唔搞得

作者: Zeta_KM 時間: 2012-3-17 23:29

翼底都唔搞得
louisa20047 發表於 2012-3-17 23:23

點解o既? 同背脊一樣原因嗎?

作者: louisa20047 時間: 2012-3-17 23:30

點解o既? 同背脊一樣原因嗎?
Zeta_KM 發表於 2012-3-17 23:29

YES

作者: Zeta_KM 時間: 2012-3-17 23:32

YES
louisa20047 發表於 2012-3-17 23:30

死啦~!!! o甘我咪成日調戲瓜子?!

要戒... 要戒.......

作者: carolee 時間: 2012-3-17 23:34

28# carolee

sorry 原來send 唔到pm...請問可以點拎呢？
迪迪仔發表於 2012-3-17 22:00

send咗短訊比妳

作者: louisa20047 時間: 2012-3-17 23:36

死啦~!!! o甘我咪成日調戲瓜子?!
要戒... 要戒.......
Zeta_KM 發表於 2012-3-17 23:32

我有隻葵成日要我調戲佢~我睬佢都傻

作者: 迪迪仔 時間: 2012-3-18 00:36

send咗短訊比妳
carolee 發表於 2012-3-17 23:34

收到.. 但係我都係回唔到你的pm.. 因為...可能我唔係會員 :p

另外都收到另一位雀友的pm.. 因為宜家夜啦..明天先call 你地.. thx so much

作者: 迪迪仔 時間: 2012-3-18 00:37

我有隻葵成日要我調戲佢~我睬佢都傻
louisa20047 發表於 2012-3-17 23:36

咁你叫佢調番你law

作者: 迪迪仔 時間: 2012-3-18 00:39

死火.. 我都一樣.. 成日同迪迪玩.. 雙手插翼.... 之後係咁捽佢個身...

作者: 迪迪仔 時間: 2012-3-18 00:39

岩岩餵完迪迪食藥...簡直好似要同佢死過咁...

作者: louisa20047 時間: 2012-3-18 00:44

咁你叫佢調番你law
迪迪仔發表於 2012-3-18 00:37

佢要我調戲佢~其實就等於調戲緊我

作者: jennymok 時間: 2012-3-18 00:48

你嘅情况同我當年(2010)隻細葵好相似, 以為第一時間睇醫生, 就會揾到原因, 點知Dr. Nichole都話有可能係心理問題(因為巳6歲), 比份關於"咬毛成因、雀鳥行為及改善方法"嘅 study kit 我就算。
我用咗大半年時間, 係每曰上網揾資料, 係每曰(d同事都話我真係前世欠落隻雀, 今世還), 睇咗不下數百篇關於咬毛嘅文章, 得出個結論 (只係個人感受, 唔代表係正確方法, 如有錯誤, 大家請代更正) :

(1) 每隻鸚鵡咬毛的原因可能唔同, 可能係(a)受驚嚇(b)食物敏感(c)繁殖期嘅心理問題(d)身體器官問題(e)睡眠不足或睡眠質素不佳(f)環境(居住及同伴)問題(g)其他。

(2) 找出原因嘅方法: 由咬毛前3個月至6個月內想下有無改變過佢嘅生活習慣(環境、人物、食物、睡眠時間等等), 如果有成日同雀雀影相嘅話, 可以响相中揾下線索。

(3) 用trial & error 形式嘗試唔同嘅方法, 我試過從
(a) 食物方面 : 睇下邊d係最容易致敏嘅食物, 有2個方法, 1. 先逐樣逐樣停食(例如停食花生一星期)睇下有無減少痕癢嘅問題, 如無, 第二星期比番花生, 停食合桃), 如果停食單一食物巳沒有痕癢嘅問題, 可確定佢對呢樣食物敏感。2. 可買Roudy Bush專為食物敏感雀雀而出嘅糧, 再逐樣逐樣加添單一食物, 睇下痕癢問題有無出現。

(b) 身體滋潤度方面 : 我地嘅鸚鵡大多來自炎熱潮濕嘅地區, 有些地方每曰都落雨, 所以濕度對佢地好重要, 自我隻雀咬毛後, 冬天我會開放濕機, 如果天氣唔太凍, 我會同佢噴"soother spray(滋潤度高因有aloe成份, 可減少痕癢)," 因為我見Harrisons website裏面套"Further Destructive Behavior Kit" 有呢支spray, 我同我朋友都覺得有效果, 但都有人試過唔得。

(c) 從睡眠時間 : 以前我幾點瞓, 隻細葵就幾點瞓, 而家每曰盡量响10:30前熄燈要佢瞓, 情況又因為早瞓好咗。

(d) 籠嘅位置 : 以前我隻細葵係放响廚房門旁及近大門, 每有人(工人時常會出入)出入廚房及大門可能都令佢有壓力, 之後放到沒有人來人往嘅地方, 佢又定d!

(e) 同佢玩嘅方法 : 以前放佢出嚟玩(每晚1hr), 一出嚟摸下佢, r下痕, 我就會上網、睇雜誌或睇電視放佢响旁邊, 佢就自己企响度r毛, 之後就不自覺咬毛拔毛。而家放佢出嚟1hr, 就真係一心同佢r毛、玩下、傾計, 唔會做其他野, 佢玩夠會好願意入籠同好tired, 好快瞓, 少咗咬毛。

(f) 揾d佢最鐘意嘅玩具消耗佢嘅時間 : 我隻細葵以前對一串串嘅玩具無乜興趣, 有雀友知道佢咬毛就送咗一包珠仔比我(因雀友隻細葵好鐘意玩), 佢就瘋狂地爱上, 每曰就掛住咬珠仔, 都無乜r毛拔毛, 之後我再加添唔再質地嘅木頭、紙、滕、膠穿起嘅玩具, 到而家佢每曰都好似好忙, 玩(咬)完d玩具又好tired又要瞓, 瞓醒又玩, 都無乜時間咬毛。

(g) 同類間嘅互動 : 我屋企有7隻雀(其中2隻雞尾), 我以前唔比佢地一齊玩, 驚佢地打交咬對方, 所以令到佢地嘅social life好唔平衡, 雖則有同類但無朋友, 但呢1、2年我比隻細葵同我細佬隻大白玩多d, 佢地會互相r毛, friend d, 鸚鵡係羣居動物, 有朋友感覺上無咁孤單! 而家大白見我推咗細葵入房, 佢會大叫揾細葵, 細葵又會應佢架。

雖然我隻細葵間唔中重有咬毛, 但由最嚴重時嘅頸、心口、背脊、腳仔無曬毛, 到而家心口出番曬(有d毛孔"物"咗出唔番), 背脊出緊巳經好好多喇! 我初初都好唔開心, 望到佢拔毛都想喊。但見佢嘅情况慢慢改善, 真係不枉我為佢付出咁多心機同時間! 希望以上嘅建議對你有幫助, 我巳PM你, 你可以隨時call我架! 大家努力呀!!

作者: MandyYung 時間: 2012-3-18 01:57

你嘅情况同我當年(2010)隻細葵好相似, 以為第一時間睇醫生, 就會揾到原因, 點知Dr. Nichole都話有可能係心理問題(因為巳6歲), 比份關於"咬毛成因、雀鳥行為及改善方法"嘅 study kit 我就算。 ...
jennymok 發表於 2012-3-18 00:48

黎到樹樹　學懂不少　也遇到好多有heart 之人　
祝福彼此既愛鸚　健康快樂地生活　！　

作者: ngkare 時間: 2012-3-18 02:10

祝福廸廸仔！主人加油！

作者: 迪迪仔 時間: 2012-3-18 14:03

Jenny. 多謝你咁辛苦打咁多字同我地分享。等我慢慢理解一下午再回覆你。

真係唔該晒

作者: jennymok 時間: 2012-3-18 14:21

唔洗客氣, 大家都係愛雀之人, 只不過分享下我嘅經歷, d方法可能不正確, 大家可提出更正及建議, 謝謝!!
廸廸仔主人, 我唔識打中文架, 我用手寫板寫架, 所以寫咗好耐。但我都曾經歷過呢種無助及痛苦, 所以希望小小嘅建議可帶給你一點的希望, 大家努力吧!

歡迎光臨 PARROT-TREE (http://forum.parrot-tree.com/)