PARROT-TREE - Powered by Discuz! Board

標題: 灰鸚鵡糧食問題求解答! [打印本頁]

作者: SJANN 時間: 2015-9-13 20:08 標題: 灰鸚鵡糧食問題求解答!

本帖最後由 SJANN 於 2015-9-13 20:28 編輯

大家好, 小弟第一次養灰鸚

想請教一下灰鸚鵡主食黎講應該食邊隻牌子糧會比較好?聽講H糧同R糧比較多人用係咪兩隻糧混比佢食? 灰鸚鵡應該食邊種H / R糧? (如果有圖的話麻煩貼一下謝謝) 果個牌子既糧大概幾錢到?

另外想問灰鸚鵡有無話唔食得咩生果 ? 同埋灰鸚應該要幾點鐘訓? 求解答謝謝!!

作者: louisa20047 時間: 2015-9-13 22:36

http://forum.parrot-tree.com/forumdisplay.php?fid=16
食得咩/唔食得咩~請入去爬文

作者: 風中飛鸚 時間: 2015-9-14 10:23

應該食邊隻牌子糧會比較好?
通用品牌就OK
聽講H糧同R糧比較多人用係咪兩隻糧混比佢食?
唔好混~選定一個牌子好啦~
灰鸚鵡應該食邊種H / R糧?
先試H糧~
果個牌子既糧大概幾錢到?
約三百多元一包~
另外想問灰鸚鵡有無話唔食得咩生果 ?
大多都食得~如果唔食得既生果~市面都比較難買~你咁都買到~抵你死~
灰鸚應該要幾點鐘訓?
晚上10點37分28秒

作者: gwensoo 時間: 2015-9-14 10:29

牛油果好易買到既, 但鸚鵡唔食得.

最近無花果當造, 可以俾雀雀試下, 好好味, 我屋企既速籠同雞尾好鍾意食.

作者: 風中飛鸚 時間: 2015-9-14 10:29

鸚鵡唔食得係婆羅奶特產~鱷魚皮萬毒鑽心果~同猛加拉既千虫穿腸果~

其實好多蘋果/橙/芒果/木瓜一般街市買到正常生果選擇~果D婆羅奶出產唔好搵咪得囉~

作者: gadgeteer 時間: 2015-9-14 11:27

慘，希望火星人唔出現，如果唔係，呢個帖又要講 20 頁...

作者: SJANN 時間: 2015-9-14 13:52

本帖最後由 SJANN 於 2015-9-14 14:13 編輯

應該食邊隻牌子糧會比較好?
通用品牌就OK
聽講H糧同R糧比較多人用係咪兩隻糧混比佢食?
唔好混~選定一個 ...
風中飛鸚發表於 2015-9-14 10:23

見到H糧有分好多種咁灰鸚應該食邊隻顏色既? 買一種H糧就夠 ? 會唔會話食多幾種唔同色既H糧會好D? 三百幾蚊包都幾貴下=.=一包大概有幾多? 係咪係大圍珍禽異獸果度有得買?

另外想問灰鸚鵡有無話幾歲到就教唔到佢學新語句? 佢識上手但想摸下佢應該從何入手? 有時想幫佢加糧伸隻手入籠就想咬人咁個咀係咁伸埋隻手到應該點做先唔會咁?麻煩解答!

作者: SJANN 時間: 2015-9-14 14:47

聽講要習慣比灰鸚咬亦唔可以縮最多只可以示意不對係唔係真?

作者: ngwaikeung 時間: 2015-9-14 15:53

[quote]慘，希望火星人唔出現，如果唔係，呢個帖又要講 20 頁...

作者: gwensoo 時間: 2015-9-14 16:49

回復 7# SJANN

300幾蚊一包果種係5磅裝, 有排食. 我通常買1磅裝, 費事開封太耐會變質, 因為我唔鍾意放糧入雪櫃.

作者: Louis 時間: 2015-9-14 16:52

H 糧標榜有機, 無防腐劑, 用冷壓方式製造, 保持營養, 所以最貴.
R 糧有防腐劑, 但價錢平一半.
其他牌子如 Kaytee, ZuPreem 亦是大牌子, 但貨源不穩定, 時不時缺貨.
溝糧亦有好處, 萬一食開隻牌子無貨, 仲有另一牌子繼續食.

H糧三百幾蚊係五磅裝, 夠一隻灰鸚食三四個月, 覺得貴可以買一磅裝.
H糧主要分三種: 紅色-高營養, 藍色-普通, 藍紅色-普通(辣椒味). 另外: 橙色-高營養細粒, 綠色-普通細粒.
根據製造商網頁資料, 灰鸚應該餵紅色.

根據個人經驗, 一歲前最肯學講野, 一歲後開始自行選擇邊d學, 邊d唔學. 學講野除左隻雀天資之外, 仲要主人有恆心地每日花大量時間與其互動, 否則就算花高價買隻已經識講既返來, 每日無時間同佢玩同佢傾計, 都會由識講變成唔識講既野雀.

伸手入籠想咬你, 因為同你未熟, 同埋未熟悉環境, 到熟左之後, 就會不停講野呱呱叫, 要你開門俾佢出來玩.

作者: Louis 時間: 2015-9-14 16:58

你飼養初期, 隻雀怕你好正常, 伸手入籠好多時只係凶你, 唔會真係咬落黎, 你只要保持鎮定, 慢動作, 唔好做多餘動作及語言, 隻雀見得多習慣左, 就唔會再怕再凶你.

作者: quinlam 時間: 2015-9-14 18:01

回復 4# gwensoo

我試過餵無花果，我隻鸚鵡唔食，但係凱克就好中意食。

作者: gadgeteer 時間: 2015-9-14 18:16

本帖最後由 gadgeteer 於 2015-9-14 18:19 編輯

千其唔好以為養熟咗就唔咬，我隻發霉雀養咗四年，基本上唔咬人，咬的話好多時都係想話我聽啲嘢，最典型嘅，就係我 no 咗佢想做嘅某啲嘢，佢發我脾氣，會特登走過嚟咬我。

講嘢方面，灰鸚的話，就完全無需擔心，我夠膽講，隻隻灰鸚都會模仿聲音，無一隻唔會，直頭係佢地啲天性嚟，問題係遲定早嘅姐。我隻發霉雀，唔教佢的話，三日內自己識搵啲無厘頭嘢講，教的話，最多兩日就識。唸詩唱歌唔計，講緊啲簡單兩三個字嗰啲。養咗佢咁耐，佢繼續學緊新嘢未聽過。

要擔心灰鸚遲講嘢，不如擔心點先可以毒啞佢....

作者: woodteak 時間: 2015-9-14 18:31

未養前好奇會講嘢，初養咗後想快d學講嘢，養咗半年之後可唔可以唔講嘢

作者: SJANN 時間: 2015-9-14 18:39

未養前好奇會講嘢，初養咗後想快d學講嘢，養咗半年之後可唔可以唔講嘢
woodteak 發表於 2015-9-14 18:31

睇到依度笑左..=.="

作者: SJANN 時間: 2015-9-14 18:43

H 糧標榜有機, 無防腐劑, 用冷壓方式製造, 保持營養, 所以最貴.
R 糧有防腐劑, 但價錢平一半.
其他牌子如 ...
Louis 發表於 2015-9-14 16:52

有無話應該由邊度開始摸會好D 手勢應該點用咩指手背定? 聽講灰鸚鈣質好重要比佢食雞蛋殼夠唔夠?

作者: SJANN 時間: 2015-9-14 18:46

你飼養初期, 隻雀怕你好正常, 伸手入籠好多時只係凶你, 唔會真係咬落黎, 你只要保持鎮定, 慢動作, 唔好做多 ...
Louis 發表於 2015-9-14 16:58

佢係好快速咁咬落黎似係攻擊咁雖然唔係好大力我有時會拎住個食物兜比佢食野佢食食下會慢慢想咬我手咁...

作者: SJANN 時間: 2015-9-14 18:48

千其唔好以為養熟咗就唔咬，我隻發霉雀養咗四年，基本上唔咬人，咬的話好多時都係想話我聽&#21 ...
gadgeteer 發表於 2015-9-14 18:16

同埋養灰鸚係咪個籠平時最好唔好擺係高個自己既地方?

作者: SJANN 時間: 2015-9-14 18:56

另外有時擺佢係鸚鵡架企左30MIN左右到就開始不斷拍翼係代表D咩!?

作者: louisa20047 時間: 2015-9-14 19:15

鸚鵡係強者係上面，弱者係下面，因為係族群中，弱者企上面會被打

作者: SJANN 時間: 2015-9-14 20:04

鸚鵡係強者係上面，弱者係下面，因為係族群中，弱者企上面會被打
louisa20047 發表於 2015-9-14 19:15

即係話唔擺得佢高過我既地方啦喎.. 一定要低過定平都得?

作者: SJANN 時間: 2015-9-14 20:26

岩岩買左紅色H糧不過10月到期應該唔會影響到健康掛

仲有好多問題想問希望各位能解答..

灰鸚會唔會愈學多講野嗚叫就會變得愈少?

灰鸚耐唔耐寒幾度開始會覺得凍?

係咪唔應該比灰鸚企上肩頭?

灰鸚有無話唔鐘意或驚D咩顏色?

暫時咁多先.. 麻煩各位解答謝謝!!

作者: louisa20047 時間: 2015-9-15 00:06

個人睇法，bb唔好放上膊頭，除左地位問題，仲有安全問題(你同鸚鵡)同習慣問題

作者: louisa20047 時間: 2015-9-15 00:09

即係話唔擺得佢高過我既地方啦喎.. 一定要低過定平都得?
SJANN 發表於 2015-9-14 20:04

世事冇一定，我有葵放得比我高，有葵放得比我矮，主要睇葵性格

作者: louisa20047 時間: 2015-9-15 00:11

喜好係好個別，除非有陰影
叫聲問題，除左性格，係主人教導問題

作者: SJANN 時間: 2015-9-15 08:08

唔記得講我依隻係二手雀係跟鳥店買既前主人就未見過, 每次佢一見手靠近就好似想咬咁但又肯上手..真係有D擔心唔知點相處=.=

作者: 風中飛鸚 時間: 2015-9-15 10:24

聽講要習慣比灰鸚咬亦唔可以縮最多只可以示意不對係唔係真?
SJANN 發表於 2015-9-14 14:47

我採佢都傻~

作者: gadgeteer 時間: 2015-9-15 11:07

另外有時擺佢係鸚鵡架企左30MIN左右到就開始不斷拍翼係代表D咩!?
SJANN 發表於 14-9-2015 18:56

無聊囉。係籠出面的話，實飛，所以要小心。

我隻發霉雀，無聊的話，會靜靜雞用半個鐘摷勻全身，儲起一堆眼睇唔到嘅粉毛垃圾，見無人理佢，有端端咁就起勢拍翼...跟住就一屋都係，佢就會好開心....

...跟住重覆....

作者: gadgeteer 時間: 2015-9-15 11:38

本帖最後由 gadgeteer 於 2015-9-15 11:41 編輯

灰鸚會唔會愈學多講野嗚叫就會變得愈少?

灰鸚耐唔耐寒幾度開始會覺得凍?

係咪唔應該比灰鸚企上肩頭?

灰鸚有無話唔鐘意或驚D咩顏色?
SJANN 發表於 14-9-2015 20:26

我只可以講下我隻發霉雀係點，同你分享下，鸚鵡呢家嘢，隻隻唔同性格，唔會有標準答案：

灰鸚會唔會愈學多講野嗚叫就會變得愈少?

我隻咩都學，總之佢覺得過癮就學，仲要學到都唔話我知，失驚無神嚇我一跳，電話響，佢會講「喂」，你吹口哨，佢吹埋一份，見到窗外有同類，喪尖叫，無時停，唔會因學到某啲嘢就唔記得以前學過個啲...

灰鸚耐唔耐寒幾度開始會覺得凍?

絕對唔耐寒，一兩歲以下，天氣涼，一定要開暖燈，你買定都得嫁勒，我隻發霉雀，養多年，冬天我都照開暖燈比佢。

係咪唔應該比灰鸚企上肩頭?

我唔會，因爲佢一上膊頭，就會咬我耳仔，試過眼鏡都比佢咬甩...

灰鸚有無話唔鐘意或驚D咩顏色?

呢個隻隻唔同，你要自己觀察下，基本上灰鸚係好細膽，好怕新事物嘅物體，一驚就飛，要小心。我隻乜都驚，淨係識得雞飛狗走，無鬼用。

作者: louisa20047 時間: 2015-9-16 01:53

聽講要習慣比灰鸚咬亦唔可以縮最多只可以示意不對係唔係真?
SJANN 發表於 2015-9-14 14:47

你係想練金鐘罩定鐵砂掌?我從無聽過有人咁教的

俾鸚鵡咬住~唔係唔可以縮~而係縮唔到~硬縮下場只有一個~傷更重~(傷口被拉開/成隻鸚鵡被你拉起~鸚鵡為自保~咀會發力以將身體提起~結果請自己想像)

鸚鵡未咬住~縮係冇問題~但最重要係之後反應~盡量唔好俾佢心想事成~佢就唔會覺得咬人係對佢有利
更進一步~有能力的話可以教佢有後果(里樣我教你唔到~因為我對灰鸚了解唔夠深)

聰明的鸚鵡~你可以教識佢地"痛"/"放口"但里個係睇個別個體+主人習慣

作者: SJANN 時間: 2015-9-16 10:45

本帖最後由 SJANN 於 2015-9-16 10:53 編輯

咁都好d=.= 幾驚真係好似網上講果d咁養得灰鸚就要預左比佢咬唔好驚佢咬.. 因為佢鐘意用口探事物最多只能習慣或盡量減少次數唔好俾佢心想事成係話唔好比佢知我驚佢 ? 佢應該係想擊退我咁係咪即係我唔好退= =?但始終想摸佢就唔知點入手..

作者: gadgeteer 時間: 2015-9-16 11:14

灰鸚咬人，以我有限經驗，有幾點要留意：

1. 鸚鵡咬人，一定要知原因，知道原因，作為主人，你就會知應該點做。

2. 例如新雀回家，隻雀未適應，佢自我保護意識強唔想人掂佢，好正常，尤其灰鸚係好怕好怕死嘅生物。係咁嘅情況，無理由仲特登伸隻手比佢咬。應該盡量比空間隻雀，等佢適應。

3. 摸唔摸得隻雀，同摸邊度，其實唔到主人話事，佢比你摸的話，你自然會知嫁勒，最緊要唔好心急，唔好貪心，記住來日方長，最緊要係建立互信。你問我，唔好摸住，試下上咗手先，同佢熟落咗先。呢個過程，可以好快，可以好多個禮拜都未必成功，完全睇隻雀。

4. 就算熟咗之後，要緊記，鸚鵡每天每刻都可以有唔同心情。呢頭同你玩到好癲，任摸任摷，個頭發脾氣唔比你掂咬到你爆缸都得，什至唔鍾意你摸鍾意第二個摸都得。

5. 唔同人可能只可以摸唔同地方，所以千其唔好以為你摸得頭，人地又摸得頭，隨時第二個摸頭比隻雀咬爆都唔知乜事。

6. 熟咗之後，有互信之後（可能講緊幾年光陰都唔定），要緊記鸚鵡都係會咬人，但我嗰隻，咬人會分力度，會細細力咬，同大大力咬，但唔會爆缸因爲隻雀知道佢唔係想整親我。係咁嘅情況，要視乎佢咬係乜原因。通常細細力咬係佢同我溝通嘅其中一個方式，我會無乜野。大大力咬都可以係，但如果明顯係佢發脾氣的話，我會 NO 佢，等佢知我唔鍾意。係 work 嘅。

7. 鸚鵡玩得癲起上來忘晒型咁，都係可以咬人，仲可以好大力添。我會 NO 佢，同比佢冷靜番下，通常好快無事。

小小分享...

作者: 風中飛鸚 時間: 2015-9-16 11:26

旺角鸚鵡天空果隻合成糧都唔錯~好像是美國進口~可以去睇下~

作者: louisa20047 時間: 2015-9-16 13:34

預左俾佢咬，唔係送隻手俾佢咬
就好似去旅行要買保險+帶平安藥，但唔係特登打開個袋俾人偷野/整病自己
鸚鵡咬人好少直接攻擊，你要係佢出口前，表示唔高興之後，若無其事咁慢慢收手，每次少少咁進攻就得，而里個過程，食物係好好的工具

作者: louisa20047 時間: 2015-9-16 13:35

旺角鸚鵡天空果隻合成糧都唔錯~好像是美國進口~可以去睇下~
風中飛鸚發表於 2015-9-16 11:26

Goldenfeast?定TOP?

作者: SJANN 時間: 2015-9-16 16:27

灰鸚咬人，以我有限經驗，有幾點要留意：

1. 鸚鵡咬人，一定要知原因，知道原因，作為主人，你就會知應該 ...
gadgeteer 發表於 2015-9-16 11:14

我會慢慢比時間佢架啦最緊要唔好成世都係想咬人咁= =希望佢唔係啦

作者: SJANN 時間: 2015-9-16 16:27

我幫佢換左H糧見佢真係唔多肯食有D擔心會餓壞佢..

作者: 風中飛鸚 時間: 2015-9-17 10:06

在H糧內放入幾粒瓜子~

作者: gadgeteer 時間: 2015-9-17 11:10

或者加入鸚鵡以前食開嗰隻糧，跟住兩種糧比例上慢慢隨住日子或鸚鵡自己嘅進度調節...

不過，你問我，直頭唔好轉糧住，餵返佢以前或舖頭比開嘅糧先，太多轉變唔好...鸚鵡已經要適應新環境，仲要比啲佢唔知係乜嘅嘢食....

作者: Kuen2348 時間: 2015-9-17 11:45

我果隻都喺唔食H糧，反而goldex fext一下就鐘意，鸚空果度得2隻形狀，要粒狀唔喺圏圈果隻會好D，唔會食時彈到周圍都喺，你可買嚟試下。
另可以買D木頭用鍊串起果D俾佢咬下玩下，等佢發牙痕有嘢咬下，四四方方有坑通常都鐘意咬。但你預佢初頭幾日驚驚青青，幾日後就會咬。
灰鸚喺特別無膽，要慢慢建立信心，瓜子喺一個好方法，摸時講俾佢聽你做乜，我會講爸爸摸爸爸摸，初初摸下頭，掂到當贏咗，即讚下佢俾粒瓜子佢食，等佢習慣，耐D摸耐少少，又讚下再俾瓜子，再耐D由頭摸到落背脊，再耐D由頭摸到尾等佢慢慢習慣。
咬你通常喺大家未建立到關係，要建立咗先，所以初頭試下隔籠同佢傾下計俾瓜子佢食，等佢對你無戒心有好感後，再隔籠梳下頭，慣咗就打開籠用手餵下又試下佢食瓜子時趁機又摸下讃下佢再俾瓜子，我初初都唔識慢慢摸索，慢慢嚟諗計㸃逐步改善關係，熟咗你會知佢幾時會俾你用手梳下頭上D毛，幾時想同你互動下，就慢慢探索佢同你玩下用口咬你手指，啱心意我會讚佢輕輕哦，又俾粒瓜子佢，佢慢慢知用乜力度同你玩，我果隻有時都會大力咗但未至於爆缸，一見佢大力咗就say no，唔聽就彈咀，再伸手指俾佢咀度講輕輕哦，慢慢會改善好多，但灰鸚好多時都係單一主人，其他屋企人就唔噉講。

作者: gadgeteer 時間: 2015-9-17 11:56

本帖最後由 gadgeteer 於 2015-9-17 12:01 編輯

我就無用瓜子，就咁用懶親切嘅語調講 “good boy” 或者 “乖仔” 代替。對我隻發霉雀隻超 work，因爲佢好鍾意比人讚，又唔使成日攞住啲瓜子，又唔使驚佢食飽咗就唔聽話...

其實各施各法，用乜方法都好，最緊要耐性。我隻發霉雀熟落咗我之後，我屋企人再用咗差不多兩年時間先熟到，可以掂佢同佢玩...

作者: hfkdfkz 時間: 2015-9-18 03:49

...........

作者: SJANN 時間: 2015-9-20 12:34

我果隻都喺唔食H糧，反而goldex fext一下就鐘意，鸚空果度得2隻形狀，要粒狀唔喺圏圈果隻 ...
Kuen2348 發表於 2015-9-17 11:45

佢肯食H糧啦餓下佢就得不過都係唔多肯比人摸但上手又肯制另外想問鸚鵡可唔可以食栗子架? 係咪要食生?

作者: Louis 時間: 2015-9-21 10:01

回復 44# SJANN

可以食栗子, 不過唔食生栗子, 因為生栗子味道澀, 熟既就好鍾意.

作者: gwensoo 時間: 2015-9-21 10:10

秋風起, 蕃薯肥, 可以餵D煨/烚蕃薯俾鸚鵡食, 有好豐富既胡蘿蔔素.

作者: 風中飛鸚 時間: 2015-9-21 10:36

順便分享下轉糧~好多時雀仔轉糧~真係有D麻煩~真係會出現唔食現象~要睇主人有幾忍心~

但要分享一個小貼士~每次見到完全冇食過既糧兜~要在雀仔面前搗晒~重新再放D新既入去~過程俾佢見到~

唔好孤寒見到未郁過就一直由得佢~

因為雀仔見到你搗左~又侵過同一類食物~佢就唔會等~佢慢慢明白~每日都係果D~唔再等好重要~

你唔換新~佢會以為你未餵~佢會有等你感覺~相反你日日換佢就知道冇希望~

作者: SJANN 時間: 2015-9-21 22:10

另外想問下聽講鈣對灰鸚非常重要請問除左專用鈣粉外(有無邊隻牌子推介同埋係要點比佢食 ?) 仲有咩其他方法可以補充鈣質?? 唔該哂

作者: gwensoo 時間: 2015-9-22 09:06

簡單方法可以餵雞蛋殼或墨魚骨. 墨魚骨係雀街同雀店有賣, 雞蛋殼可以烚10分鐘消毒然後晾乾整碎俾佢食.

作者: SJANN 時間: 2015-9-22 09:30

簡單方法可以餵雞蛋殼或墨魚骨. 墨魚骨係雀街同雀店有賣, 雞蛋殼可以烚10分鐘消毒然後晾乾整碎俾佢食.
gwensoo 發表於 2015-9-22 09:06

唔該哂, 但尋日就係試過餵佢雞蛋殼佢都丟左佢

遲D睇下墨魚骨得唔得先..

作者: 風中飛鸚 時間: 2015-9-22 10:09

[quote]另外想問下聽講鈣對灰鸚非常重要請問除左專用鈣粉外(有無邊隻牌子推介同埋係要點比佢食 ?) 仲有咩其他方 ...
SJANN 發表於 2015-9-21 22:10

[/quote
多食紅色肉生果~例如:士多啤梨/車里子/木瓜之類紅色果肉生果~然後多晒太陽~天然又冇害~

作者: SJANN 時間: 2015-9-22 23:47

[quote]另外想問下聽講鈣對灰鸚非常重要請問除左專用鈣粉外(有無邊隻牌子推介同埋係要點比佢食 ?) 仲有咩 ...
風中飛鸚發表於 2015-9-22 10:09

即係西瓜都得? 唔該哂!

作者: 風中飛鸚 時間: 2015-9-23 10:12

即係西瓜都得? 唔該哂!
SJANN 發表於 2015-9-22 23:47

西瓜只係食完要洗腳~

作者: gadgeteer 時間: 2015-9-23 10:19

西瓜只係食完要洗腳~
風中飛鸚發表於 23-9-2015 10:12

係洗腳，洗面，洗頭，洗兜，洗籠，洗地，洗牆，洗屋....

作者: gwensoo 時間: 2015-9-23 10:21

回復 54# gadgeteer

嚴重懷疑你講緊點清理兇案現場!

作者: gadgeteer 時間: 2015-9-23 12:06

同電視劇比較，慘過兇案現場，次次食親多水份食物，實天一半地一半，fing 到周圍都係，一個西瓜食得嗰兩錢，下次餵啲咁嘢，將佢放落浴缸拉埋浴簾先比佢食....

作者: SJANN 時間: 2015-9-23 12:10

仲有想問灰鸚沖涼果度應該要點沖?

作者: gadgeteer 時間: 2015-9-23 12:52

仲有想問灰鸚沖涼果度應該要點沖?
SJANN 發表於 23-9-2015 12:10

呢個問題我完全幫唔到你，我隻發霉雀，幾年嚟，未沖過涼，見水即走....

作者: kolaball 時間: 2015-9-25 19:00

搭單一問，你地買到的墨魚骨是否都有點魚腥味？唔知係咪因為有味所以我家的不吃。。。。

作者: SJANN 時間: 2015-10-2 21:09

現在跟牠相處好多了..會自己伸頭埋黎要人摸.. 但關於補充鈣方面還有問題有餵牠紅肉水果但好像沒有改善咀部都係變得白白有粉咁.. 請問各位仲有咩方法或最有效可以幫補鈣質? 感謝

作者: louisa20047 時間: 2015-10-2 23:23

現在跟牠相處好多了..會自己伸頭埋黎要人摸.. 但關於補充鈣方面還有問題有餵牠紅肉水果但好像沒有改善咀 ...
SJANN 發表於 2015-10-2 21:09

灰鸚本身就有羽粉~冇粉先大件事呀

作者: 風中飛鸚 時間: 2015-10-3 10:25

灰鸚羽粉算大架~

作者: SJANN 時間: 2015-10-3 10:56

唔係話羽粉 SORRY係我表達得唔清楚我意思係佢個咀缺鈣果種灰灰白白咁其實係咪比佢食鈣粉最好?

作者: louisa20047 時間: 2015-10-3 19:50

其實咀甲同指甲係由蛋白質組成，唔係鈣，咀唔靚關鈣咩事?

作者: SJANN 時間: 2015-10-3 23:43

喔原來係蛋白質咁請問可以食D咩黎進補?? THX

作者: gadgeteer 時間: 2015-10-5 10:55

多餘一問：個嘴灰灰白白，會唔會係磨嘴做成嘅呢？我隻發霉雀，成日用磨抓棍抹嘴，個嘴唔使講就梗係花鬼曬，灰灰白白，發晒霉咁...

作者: scylam 時間: 2015-10-5 10:58

多餘一問：個嘴灰灰白白，會唔會係磨嘴做成嘅呢？我隻發霉雀，成日用磨抓棍抹嘴，個嘴唔使講就梗係花 ...
gadgeteer 發表於 2015-10-5 10:55

系吖，點似細個嗰陣，油光滿咀

作者: SJANN 時間: 2015-10-5 16:30

我果隻係買返黎已經5歲了岩返黎果時個咀都係好黑有光澤但我養左一個月唔夠就變灰白了

作者: louisa20047 時間: 2015-10-6 02:37

細個時唔識磨咀又唔夠羽粉，睇落就當然好似滿咀油光啦
大左會磨咀又夠羽粉，好似我頭像隻葵咀咁灰灰白白係正常的
想睇佢地油令令好易，將你塊面黐埋去，一掂到面油就變油亮嫁啦(不過你塊面保唔保得住就難講左少少)

作者: scylam 時間: 2015-10-6 15:45

細個時唔識磨咀又唔夠羽粉，睇落就當然好似滿咀油光啦
大左會磨咀又夠羽粉，好似我頭像隻葵咀咁灰灰白白係 ...
louisa20047 發表於 2015-10-6 02:37

咦，好喎，叫女士哄埋去佢咀，一個補油，一個補粉

作者: louisa20047 時間: 2015-10-7 02:42

咦，好喎，叫女士哄埋去佢咀，一個補油，一個補粉
scylam 發表於 2015-10-6 15:45

補粉要黐佢地個身(黐完會白左半塊面......)
(咦~好似多左個機會俾你識女仔喎~XD)

作者: dorisywy 時間: 2015-10-8 15:28

你地試下俾d豬肉，雞翼骨佢地食，我仔至like.吾錯架。有骨膠原。

作者: ReBorn 時間: 2015-10-10 13:50

你地試下俾d豬肉，雞翼骨佢地食，我仔至like.吾錯架。有骨膠原。
dorisywy 發表於 2015-10-8 15:28

我直以為鸚鵡食齋......

作者: louisa20047 時間: 2015-10-11 01:11

我直以為鸚鵡食齋......
ReBorn 發表於 2015-10-10 13:50

野外鸚鵡都唔係食全齋~不過如果俾葷食~請留意後果

作者: SJANN 時間: 2015-10-13 20:57

又有問題想請教一下平時灰鸚鵡D爪應該點磨平佢? 試過用磨爪棍但第日已經見枝棍血跡斑斑腳皮都磨到流血佢都未磨到爪 ..定係有邊隻牌子既磨棍好推介 ? 唔該哂

作者: louisa20047 時間: 2015-10-14 03:32

你果枝磨爪棍係咩棍?你點放呀?

作者: SJANN 時間: 2015-10-14 10:54

唔記得咩牌子但係五顏六色外國既表面好多一粒粒沙痴係上面果隻
好似平時d企棍咁扣係籠入面

作者: SJANN 時間: 2015-10-20 11:23

依幾日伸手埋去佢DUM低頭要人摸咁(之前好多次都係咁) 但今次摸左陣佢無啦啦一啖咬落黎都幾大力下佢都快6歲了點解會咁? 發覺佢依幾日都會有D攻擊性求解答唔該哂

作者: gwensoo 時間: 2015-10-20 11:47

會唔會出緊新羽毛, 你唔小心搓到佢既羽管, 令到佢唔舒服丫?

我隻雞尾每次俾我搓到羽管都會發惡亂咬我, 然後又再DUM低頭叫我摸過.

作者: gadgeteer 時間: 2015-10-20 14:43

無特別原因，只係玩嘢或者為咬而咬，我隻發霉雀久唔久都係咁，純粹睇心情。係咁嘅情況，我會停止摸佢，唔彩佢。

作者: SJANN 時間: 2015-10-20 20:26

因為依家有時佢見到手指都會想咬落去咁..唔知做咩

作者: Kabayama 時間: 2015-10-21 13:33

台灣的合美建27-A是不錯的中大型鸚鵡日糧

歡迎光臨 PARROT-TREE (http://forum.parrot-tree.com/)