PARROT-TREE - Powered by Discuz! Board

標題: 渣甸鸚鵡一問 [打印本頁]

作者: CCookie 時間: 2015-9-16 13:28 標題: 渣甸鸚鵡一問

各位,小妹剛飼養渣甸鸚鵡 (10個月大)一星期多,原本在店舖時很乖很跟人,可上手。可是現在很惡,咬人, 不肯出籠。不想她變成觀賞鳥, 請問有什麼方法? 謝謝

作者: louisa20047 時間: 2015-9-16 13:36

係咪嚇親呀？
入門幾耐?

作者: CCookie 時間: 2015-9-16 13:54

有可能係,屋企有小朋友成日大聲叫佢

入門12日, 早兩日嘗試用樹枝引她,原本想出,後尾不肯,咬住個籠, 之後想捉佢出黎,佢叫到好似比人劏咁,仲成身震,嚇死我。宜家想摸下佢,佢好多時都咬人。

作者: gadgeteer 時間: 2015-9-16 14:34

本帖最後由 gadgeteer 於 2015-9-16 14:42 編輯

入門12日, 早兩日嘗試用樹枝引她,原本想出,後尾不肯,咬住個籠, 之後想捉佢出黎,佢叫到好似比人劏咁,仲成身震,嚇死我。宜家想摸下佢,佢好多時都咬人。
CCookie 發表於 16-9-2015 13:54

邊個叫你捉？

你實在太過淨係企係你自己角度諗，又心急，無係隻雀角度諗，唉........恕我直言，你唔多適合養雀.....到問你係咪嚇親呀？你都仲淨係識答 “有可能係”，跟住推落啲小朋友度...

真唔好意思，睇完，我真係嬲嬲地，亦凳隻雀可憐....

.

作者: louisa20047 時間: 2015-9-16 14:39

咪搞佢住啦，咁搞法，佢分分鐘仲驚過行入侏羅紀公園
鸚鵡返屋企，頭一排係俾大家互相習慣對方的存在，再嚇佢，一陣真係嚇死/壞左就冇得救嫁啦

作者: louisa20047 時間: 2015-9-16 14:41

好彩你果隻係細鸚鵡，俾著大鸚鵡，你咁蝦佢，佢保證你日日入醫院呀

作者: CCookie 時間: 2015-9-16 14:50

就係知做錯了, 所以想請教各位

作者: CCookie 時間: 2015-9-16 14:52

Re: gadgeteer

有可能係 ß- 係引佢出籠之前

之後 … 我當然知我嚇親佢啦

作者: 風中飛鸚 時間: 2015-9-17 10:05

係常見現象~俾D時間同佢建立感情~佢喜歡食既野~就由你手上俾佢~

作者: CCookie 時間: 2015-9-17 12:47

多謝大家的意見
會比多d時間大家互相適應、同佢好好建立感情先

作者: bird-bird 時間: 2015-9-17 15:58

我養左渣甸幾年, 我果只初初返黎, 除左換糧同洗籠, 頭10日吾攪佢, 行過佢個籠吹下口哨, 同佢少少眼神接觸, 叫下佢個名, 等佢有反應, 反應就係...當你叫下佢, 佢會望你, 或者佢走近d望下你, 或者你行左, 佢係籠入面跟你方向行, 甘你可以試下喂d 野比佢食, 當然都係隔住個籠, 大家再熟d, 咪開門試下比佢自己出黎, 要慢慢黎,你覺得佢開始吾怕你, 可以試下上棍, 上棍都OK, 就可以試上手, 因為我只渣甸都幾慢熱, 同埋佢好細膽, 吾可以大動作, 差吾多一年時間先肯跟我, 而家一開門, 就好吾客氣飛去我膊頭,
你諗下, 佢同你三吾識七, 比你帶左返屋企, 仲要捉佢, 佢驚你鋸左佢多d.........
所以吾好急, 要有耐性慢慢黎.

作者: gadgeteer 時間: 2015-9-17 16:15

本帖最後由 gadgeteer 於 2015-9-17 16:25 編輯

唉，多口講句，我斷估咁講：養之前唔做任何功課，以為邊養邊學就得，鸚鵡之嘛，有幾難，比啲糧，比啲水，好易嫁咋，人地啲鸚鵡玩雜技，教兩嘢應該得啦咁聰明，佢唔制，捉住佢嚟打咪得囉，大不了佢都係係個籠度唔使出嚟，唔會煩到人...過一排，隻鸚鵡仲係識得驚，乜都唔識，送比人算....

唉，唔再講勒，唯有希望你唔係呢類主人，好心你啦，做下功課，bird-bird 兄講嘅真係好基本好基本好基本，屬冰山一角，網上大把資料大把書你買你睇你讀，唔好出事先嚟問啦...

作者: gwensoo 時間: 2015-9-17 16:39

我覺得我算好好彩. 養雞尾, 一帶返屋企放出來就好唔客氣咁直接上我膊頭, 完全唔需要冷靜期適應期. 養凱克又係, 返到屋企摸佢, 佢雖然會用隻腳撐開我手指, 但只要有野食, 佢就即刻衝埋嚟, 第二日已識聽指令俾腳, 而且三日內上埋手. 真係謝天謝地, 唔駛戰戰兢兢, 驚佢唔食唔跟人.

作者: bird-bird 時間: 2015-9-17 16:42

唉，多口講句，我斷估咁講：養之前唔做任何功課，以為邊養邊學就得，鸚鵡之嘛，有幾難，比啲糧，比&# ...
gadgeteer 發表於 2015-9-17 16:15

我相信CCookie會係好主人, 加油!!!!

作者: gadgeteer 時間: 2015-9-17 16:57

本帖最後由 gadgeteer 於 2015-9-17 16:58 編輯

我相信CCookie會係好主人, 加油!!!!
bird-bird 發表於 17-9-2015 16:42

承你貴言，我都希望係。但一聽到話用樹枝嚟引雀出嚟（支樹枝仲要唔知邊度嚟），唔成功就用手捉，我聽到真係把幾火.....明顯連基本常識都無，要惡補.....

作者: CCookie 時間: 2015-9-17 17:33

我所講的樹枝係可以放入籠比佢站立的 "搭" （個名應該係咁）,尋日諗唔起個名。。。叫咗做樹枝
並不是隨便執回來。。。令你誤會

再次多謝各位的經驗之談
我相信我會是一個好主人。。。給她幸福快樂的生活

作者: Louis 時間: 2015-9-17 19:33

由於你家有小朋友，情況較為麻煩，因為小朋友叫聲以及快速既動作好容易嚇怕鸚鵡。建議你依家從頭來過，乜都唔好做，唔好心急上手，由得隻雀慢慢習慣新環境，習慣小朋友叫聲及動作，平日只係換糧換水換報紙。間中隔住籠餵零食，直至佢肯隔住籠自行過來問你要零食，肯俾你摸最仔同埋R頭。
下一步就係屋企環境清靜時，關好門窗，打開籠門，等隻雀自行出籠去探索屋企環境。在籠外期間，你自己動作都要慢同靜，你可以用零食引佢，建立信任，令佢先唔怕你隻手，再慢慢訓練佢企上你手。
當雀仔晌地下時，好冇安全感，想企去高既地方，此時你伸手去佢腳前，就好容易自動企上手。然後你放返佢落地，再重複企上手動作，好快就教識。

作者: 東東主人 時間: 2015-9-20 10:18

養了渣甸差不多三年半，牠的性格很好，很親人，而且不只跟一個主人，只要是家庭成員，對牠好的就會主動親你，請放心。購買前在店舖可上手是因為牠在熟識的環境，有信任的店員在旁，店員叫牠上你手，牠就會乖乖上你手，因我帶鸚鵡到公園，有主人在旁，公園好奇的小朋友想摸摸牠都可以，若主人不在旁就不會接受。轉換一個新環境和新主人需要時間去接受和建立互信，十多天實在太短，預一個月差不多，牠躲藏在籠裏就是覺得籠可給牠保護，表示對外面的環境和人的不信任。現在什麼也不用做，只需要好好的照顧牠，供水，供食物，給牠清潔鳥籠，讓牠感受到你對牠好，牠就會主動接近你，如幫牠換糧時，當你的手還在籠時，牠會急急走近取食，表示牠已不怕接近你的手，相信你不會傷害牠，這是第一步，接著就可以用手餵食牠喜歡的食物，下一步就可以 R頭，摸牠的手就要遲些，因為是肌膚之親，彼此會感受對方的溫暖，可以摸手仔就差不多可上手。個別鸚鵡這過程時間的長短會有差異，與牠過去的經歷亦很有關係，不用急，只要真心對牠好，牠會感受到，一定會接納你，同時會對你身邊的人好，這是渣甸最可愛之處，不會只親近一個主人及為了完全佔有主人而攻擊主人身邊的人。

作者: ReBorn 時間: 2015-9-20 12:31

企枝同玩具係引唔到雀架...
全部係用食物, 鍾意嘅食物!

作者: wongleung 時間: 2015-9-20 13:23

入黎學習下。

作者: CCookie 時間: 2015-9-25 01:24

多謝各位師兄師姐的意見。經過這幾天的適應期。。。
今日幫她清潔籠舍更換食物和水時
大門一開，她就跳了出來，然後爬上籠頂。我嘗試給她站棍，她ok，上上落落玩了一會。而且肯乖乖的站在棍上讓我放回入籠
我想她應該開始適應了

再想請問各位是如何幫鸚鵡沖涼？我用噴水壺向她背部輕噴兩下，她好像很不喜歡。。。請問問題在哪？她之前在雀店也是這樣沖涼的。。。

作者: 風中飛鸚 時間: 2015-9-25 10:14

沖涼好簡單~你剛回家隻雀~先BOOK大圍照X光~種菌同抽血驗~另外密識定下一隻渣甸~

跟住就可以用水噴下佢~乾淨晒~

作者: gwensoo 時間: 2015-9-25 10:36

我基本上無同雀沖涼既習慣, 我鍾意佢地身上陣雞味.

不過我d雀好衰, 佢地好鍾意係浸落個水兜度自己沖, 咁, 我又阻止唔到, 唯有由得佢地沖啦.

我隻凱克仔初返屋企好鬼臭, 一陣膠味, 真係膠味唔係講笑, 唔知點解會有咁既味, 我無特登同佢沖, 後來佢自己好似都頂唔順自己陣味, 就自己跳落水兜到洗白白, 洗咗幾次之後陣膠味無晒.

作者: 風中飛鸚 時間: 2015-9-25 12:50

一百個主人~99.998個~都用人類需要~套入鸚鵡身上~雀鳥同哺乳動物完全唔同~沖涼點睇?我就由佢自己決定~

作者: 東東主人 時間: 2015-9-26 08:02

本帖最後由東東主人於 2015-9-26 08:19 編輯

我隻渣甸，夏天每月淋浴一次，冬天就只讓牠感到有須要時用水兜的水自己沖洗。夏天會當牠用水兜沖洗時就帶牠到浴室用花灑把牠淋到全濕，花灑出水必須調校到最弱及最慢，或可用噴水壺，但必須盛載新鮮水，淋浴時注意不要向著牠的鼻孔沖水。夏天牠用水兜自己沖涼的頻密程度可能多於一個月一次，但都不宜多給牠淋浴，因鸚鵡背部近尾處有一油脂分泌腺粒，牠會從該處取油脂塗在羽毛上使羽毛健康，若淋浴太頻密，會把羽毛上的油脂沖去，羽毛會變得不健康，失去光澤。另外，淋浴應選擇在陽光普照的時間，讓牠淋浴後把羽毛盡快晒乾，否則就要用風筒或暖風機吹乾，避免著涼。

作者: 風中飛鸚 時間: 2015-9-26 13:34

有朋友隻灰鸚22年從未沖過涼~未病過~
另外一個朋友隻灰鸚回家1日沖涼~10日死左~~

但幾時都係情願養10日乾淨灰鸚~好過養一隻22年唔乾淨灰鸚啦~大家話係咪~

作者: CCookie 時間: 2015-9-27 01:28

咁我都係隨佢喜歡啦，唔攪咁多，唔想錫佢變成害佢。等佢有明確意願想沖先

多謝各位嘅意見

作者: 風中飛鸚 時間: 2015-9-29 10:33

另外要提下大家~(我已經非常小心~周時都差D中招)在家中取雀出來~要檢查門窗~因為所有雀鳥~都感應到窗外氣流~會直飛去打開既窗~(例如你已經將窗關~以為安全~佢會飛入渡有關窗房間)大家要注意~

作者: gwensoo 時間: 2015-9-29 10:48

回復 28# 風中飛鸚

講開氣流, 我都有個慘痛既經驗. 我全屋既窗都裝咗格仔網或防蚊網, 唯獨是廚房無裝, 因為諗住班雀從來唔去廚房, 而且廚房環境亦唔適合裝網.

話說果日, 我收工返屋企, 如常放班雀出來, 然後入睡房

作者: gwensoo 時間: 2015-9-29 10:53

話說果日, 我收工返屋企, 如常放班雀出來, 然後入睡房, 前後唔夠3分鐘, 出返來已經唔見咗隻雞尾. 初時我以為佢飛咗入廁所, 入去搵, 唔見, 搵均全屋都係唔見, 果一刻我至意識到, 佢真係飛走咗. 明明佢從來無入過廚房, 明明廚房都有窗花(但無格仔網), 佢都仍然可以飛得走, 只能怪自己百密一疏太大意. 所以希望大家多d注意, 唔好學我咁走失咗隻雀至係度後悔.

作者: mannawg 時間: 2015-9-29 12:09

各位,小妹剛飼養渣甸鸚鵡 (10個月大)一星期多,原本在店舖時很乖很跟人,可上手。可是現在很惡,咬人, 不肯出籠 ...
CCookie 發表於 2015-9-16 13:28

請問樓主在哪裡買渣甸鸚鵡呀?, 好似好小見有

作者: CCookie 時間: 2015-9-29 12:32

我在雀街傑x買的
我都覺得好好彩，撞啱有賣
佢好靚

作者: CCookie 時間: 2015-9-29 13:38

[attach]48885[/attach][attach]48888[/attach]

作者: CCookie 時間: 2015-9-29 13:54

多謝師兄提醒，我會謹記把門窗關上

作者: 東東主人 時間: 2015-10-1 09:30

我幫渣甸剪了飛行羽，不用擔心牠會飛走，可以任何時間跟牠更親近，不需要待關上窗才能放牠出籠玩耍。不喜歡將牠困在籠內，覺得令牠失去自由，故沒有買籠給牠，只買了可調校升降的企架，另為牠建造了私家遊樂場，玩具就扣在遊樂場上，牠可自由爬梯落地四處走動，有些時候感到孤獨牠會走入房間找人抱抱，牠懂得踏到腳上乘坐人肉升降機，爬到胸口，整個身子貼在胸口上安睡，很窩心！晚上就在企架上加包被，令牠有黑暗和安靜的環境安睡。養一隻鸚鵡是可以這樣的，如果多養幾隻，就要困籠，讓牠們各自有自己的空間，避免彼此起爭執。

作者: 東東主人 時間: 2015-10-1 13:28

本帖最後由東東主人於 2015-10-1 13:29 編輯

[attach]48889[/attach][attach]48889[/attach][attach]48889[/attach]
這就是牠的生活照

作者: louisa20047 時間: 2015-10-1 23:14

剪左翼一樣飛到

作者: 東東主人 時間: 2015-10-1 23:50

剪得正確是不可能高飛，並要時常留意修剪，我的渣甸三年多來都是全無束縛地生活，露台門亦不需關上。

作者: gadgeteer 時間: 2015-10-2 11:23

本帖最後由 gadgeteer 於 2015-10-2 11:25 編輯

剪得正確是不可能高飛，並要時常留意修剪，我的渣甸三年多來都是全無束縛地生活，露台門亦不需關上。
東東主人發表於 1-10-2015 23:50

忍唔住要講，唔知咩叫剪得正唔正確，但剪咗翼毛一樣可以高飛。你隻渣甸可能淡定，我隻乜都驚一餐，放低屎塔蓋唔覺意放得大力啲，嚇一嚇，就會出盡飲奶力逃命，唔好話剪翼毛，剪埋對翼，一樣飛上屋頂....

作者: louisa20047 時間: 2015-10-2 18:08

剪得正確是不可能高飛，並要時常留意修剪，我的渣甸三年多來都是全無束縛地生活，露台門亦不需關上。
東東主人發表於 2015-10-1 23:50

剪得不正確才不可能高飛~但後果可能係永遠都冇得飛

作者: ReBorn 時間: 2015-10-3 01:58

講開沖涼, 我覺得係天性黎
果時換左兜新鮮食水比佢, 佢望住個兜, 用咀沿邊畫一個四方
然後望住d水, 頭唔郁, 但個身..鬆毛fing身

跟住開始教沖涼

作者: 東東主人 時間: 2015-10-3 07:37

本帖最後由東東主人於 2015-10-3 07:42 編輯

回復 39# gadgeteer
不知閣下是否有為鸚鵡剪飛行羽的經驗，剪後牠仍然會飛，但不能高飛，最多比原來身處高度高10cm就會向下，所以不可身處高過窗台的位置及太接近窗口，離家外出就一定要扣鍊。我隻渣甸一向很膽小，在家看見雨傘及膠袋就飛，有特別聲音又飛，初時外出有大車經過又飛，這可能是鳥類自衞的本性。剪飛行羽後可讓牠在家得到自由，但同時很多地方需要注意，如不要不小心踏到牠，有轆的椅要小心不要傷到牠的腳，教導牠不准入廚房及出露台等......，與教小朋友沒多大分別。在這裏只想跟各雀友分享自己的經驗，故不會就此爭論，各人有自己的養雀方法，沒有一定法規，更不想別人因不當使用我的方法，引至走雀或令愛鳥受傷而受到以責備，所以再不會就此話題發表意見。

作者: dead 時間: 2015-10-10 13:29

我隻雞尾開始養時，同你情況差不多 ~~  只可以氹  不可以嚇~
但  我另一隻鸚鵡折衷  , 同一方法氹左佢一年 , 一樣會好惡咁咬人 ,  佢肯上手 , 識聽指令 , 但係唔比人摸頭 ,  好有性格 ! 仲識發脾氣  ~~ 哈哈

指令  video :
Parrot First trick - Eclectus Parrot - 折衷第一個小雜技：http://youtu.be/fxjbKOTdagM

咬人 video:
搶鸚鵡玩具嘅下場。。。： http://youtu.be/I08ELJ7HZZc

歡迎光臨 PARROT-TREE (http://forum.parrot-tree.com/)