我細個果陣都養過幾年彩鳳,不過都係當觀賞鳥在籠裏面養,後來搬咗屋就無再養.直到若干年後有一天去花墟,無意中發現咗雀街,到第二次同個老友一齊去行,都係諗住睇吓就算,點知行到中間一檔,事頭婆放晒d雞尾出黎,其中有一隻黃化,一隻珍珠好似好乖咁企响道,我老友即刻中晒毒,要我買,我原全無心理準備要買雀,最後商量後決定買咗放係佢屋企養(我每星期都去佢屋企).於是滿心歡喜帶住二隻雞尾返屋企.到咗第二朝,懷住新鮮及興奮的心情打開塊籠布,當堂呆咗,隻珍珠成隻硬咗瞓响籠底,當我仍然沉醉於新雀的歡愉中,瞬間巳被打入死雀的惡夢裏.我真係接受唔到,望住餘下果隻黃化,有小小鬆毛,係咪病呢?如果有病就要快d食藥.當時好單純,只係一心諗住醫返隻雀,無諗到其他,如果我帶佢去其他雀舖問,可能可以救返隻雀, 但我就帶佢返去事頭婆道,事頭婆點會認自己賣病雀丫,佢仲大話連篇,又話佢細個所以成日瞓,又話佢無咗個伴傷心,買返隻伴就無野啦,最後佢响個大籠道捉咗一隻黃化塞入我個籠道,就係咁,我就用咗半價帶雪兒返屋企,其實連佢個樣都未睇清楚.好彩原來佢好靚,而先前果隻最後因缺乏醫治而死亡,這件事到而家我都耿耿於懷!可能之前果二隻只是過客,負責帶引雪兒來我家中,雪兒才是真命天子!
由於一星期內死二次雀,令到我有陰影,一路都唔敢再加雀,因為雪兒一直都係自己一個未見過同類,所以佢都唔知自己係鸚鵡,當咗自己係人仔,直到第2隻雞尾(十仔)的出現……待續 |
發表於 2011-5-4 10:49
|