一樣米養百樣人，一種糧養百種鳥

起初養灰鸚同銀頂果陣覺得佢地好乖，好跟主人，跟著心思思想養番種活潑d獨立d既鸚鵡，於是膽粗粗養多兩隻黃頸金剛，點知呢兩隻衰野係而家全屋最爹最黏人既小魔怪，我去到邊跟到邊，有時直情係你腳邊，爭d就踩死佢。跟著又唔識死養多兩隻葵花，爬完文咁耐，大部份既葵花都好黏身，關注少陣都唔得，點知我隻中葵超獨立，佢可以任玩任摸，但佢最鍾意自己玩，鍾意由一個籠爬去第二個籠，食下人地d糧，咬下人地d玩具，我叫佢，佢就上兩秒手，應酬下我咁。而家輪到隻藍黃仲衰，聽人講藍黃比較野性獨立，點知隻衰野唔知係咪受過傷，又係一隻跟尾狗仔咁，我行去邊跟去邊，邊個係我身邊都有罪咁，見雀就想打，見人就想咬，但到我一同佢講byebye，佢就好似癲左咁，大叫byebye，叫到要錫番，同埋同佢解釋要瞓覺喇先好d，講左咁耐，其實咁窩心反而係隻灰鸚，見親我返屋企就會同我講：「媽咪返黎啦！」，見其他鸚鵡大叫就會學爸爸講：「喂，唔好嘈！」，所以所有鸚鵡都有唔同性格，真係好吸引。不過再比我揀，我都唔會養咁多隻，專注照顧一至兩隻比較好！