Louis

蟎蟲(又稱疥癬蟲, air-sac mite)感染, 可以去鸚鵡店或雀街龍華軒, 買支殺疥癬蟲藥水, 撥開羽毛, 滴一滴藥水於頸背皮膚上, 等皮膚吸收, 因為彩鳳體形細小, 一滴藥水已經足夠, 唔好貪多, 滴太多可引致藥物中毒. 如果屋企有其他細雀, 最好都滴埋, 因為呢種寄生蟲病容易傳染.
滴藥水前後兩日唔可以沖涼, 因為隻藥水係脂溶性, 靠皮膚油脂吸收及帶勻全身. 如果沖完涼滴, 由於皮膚油脂被洗走, 會影響藥物吸收; 而滴完沖涼會洗走d藥.
滴一次, 藥力可維持三星期, 三星期後再滴第二次, 再三星期後滴第三次完成整個療程.
從第一次滴藥開始, 約兩個月時間, 隻雀應該會回復本來樣貌.

詳細資料:
http://www.allbirdproducts.com/newproductpages/scatt.html

Louis

其實呢張相係佢快睡既時候影 平時好有精神
唔單止呢隻雀 好似其他彩鳳都有感染到
但好輕微
呢個病會很嚴重嗎
今個星期內去買藥 想問大約幾錢
ikouhaha 發表於 2012-10-3 19:31

初期病徵, 就如你所見, 影響毛囊, 皮膚, 及角質生長組織(咀部, 腳部, 及爪).
使咀部生長畸形, 影響進食, 嚴重可使咀部脫落.
使腳部及爪生長畸形, 影響站立及行動, 嚴重可使趾爪脫落.
寄生蟲會沿鼻孔氣管爬入呼吸系統寄居繁殖, 令隻雀咳嗽氣喘, 使呼吸系統變弱, 容易受到細菌病毒感染.

鸚鵡店賣原裝正版, 賣二百幾蚊一支, 但係一大支有幾十毫升, 一世都用唔完.
雀街龍華軒就賣散裝, 入落眼藥水樽仔, 大約十毫升, 有無過期? 是否原裝正貨? 無人知, 不過就賣四十幾蚊.

Louis

如果藥樽上有藥物成份名稱及濃度, 因為係自行用藥, 並非經醫生或藥劑師指導, 安全起見最好先上網查一下, 了解該藥物特性, 正確用法, 副作用, 及使用前注意事項.
所有殺蟲藥都係毒藥, 無毒又點殺到蟲?
雀檔賣藥, 對藥物全無認識, 亂講一通, 用多左係你隻雀中毒, 唔關雀檔事, 貨品賣出了, 錢已經收了.
如果樽上無任何該藥物成份資料, 使用就要更小心. 你自己都擔心食左d藥落肚會中毒, 所以雀檔講既用法係自相矛盾, 如果係滴落頸背, 就唔會食到落肚, 上面第三帖已經教你正確用法及使用份量.

Louis

有病就應該一早要分開, 既然已經養埋一齊, 要傳染都傳染左, 同籠所有雀都一齊滴藥啦.
滴藥之後, 幾日內d蟲應該已經會死, 但係面部及腳上既死皮組織唔會即時脫落或回復, 要等最少兩三個星期新皮新羽毛長出, 舊死皮至會脫落, 所以用藥後過幾日, 外表都唔會有改變, 唔知道有無效, 要耐心等.
但如果之前已經有氣喘, 易倦, 無胃口等徵狀, 殺蟲後就應該會有所改善.