Louis

該藥只係普通傳統抗敏藥, 價錢好平, 每日藥費少於$1, 一般社區藥房有售, 常用於花粉症人士, 唔屬於處方藥物, 購買時毋需醫生紙.

大家唔好誤會係甚麼鸚鵡咬毛特效藥, 鸚鵡咬毛有好多原因, 除生理病患, 心理因素之外, 過敏症係其中之一. 過敏原難以追查, 可以係食物成份, 可以係空氣中物質, 可以係日常接觸物質. 服用此藥只係針對過敏症姑且試一試而用, 未必一定有效, 但起碼對健康無害, 用者需要恆心耐性, 連續用藥兩三個月或更久, 直到季節改變鸚鵡換新羽毛時, 先至會觀察到有否成效.  

此藥安全, 唔會傷肝傷腎或引致中毒, 所以屬於非處方藥物, 其常見副作用:"容易瞌眼訓", 亦有助於鸚鵡舒緩情緒, 所以對於咬毛鸚鵡生理及心理上, 都有某程度上幫助.

但要注意, 如果永久長期服用, 藥效有機會隨時間慢慢失去, 到時可能需要轉用另一成份抗敏藥.

Louis

使用此藥並不是甚麼偏方, 大部份雀鳥醫學書籍都有教使用此藥來治療咬毛.

如果各位曾經因為隻鸚鵡咬毛, 帶過去大圍睇醫生, 做齊驗血X光都 check 唔到病因, 醫生就會開呢隻抗敏藥, 嘗試幫隻鸚鵡止痕及令其"瞌眼訓", 減少咬毛次數. 但往往療程完成停藥後, 過一排隻雀又開始咬毛, 而好多人覺得再睇醫生係浪費金錢時間, 自自然然就歸咎於心理問題.

其實在一開始服此藥, 我地唔知有冇效, 只有一直繼續食, 直至再出新毛而隻雀又唔會再去咬, 先可以確定此藥有效, 而隻雀咬毛原因可能係長期接觸不明致敏物質.

例如重金屬中毒, 都會導致咬毛. 如果無睇過醫生就自行使用此抗敏藥, 正如我講過要食幾個月至知道結果, 這樣就有機會延誤病情, 令中毒越來越深, 造成反效果. 所以我教雀友用此藥前, 會先解釋精楚利弊, 然後讓雀友自行決定使用與否, 當然正確做法係先睇醫生作詳細檢查, 查唔出生理病因至使用此藥.