伽衷好返喇! ^O^

本帖最後由 davy 於 2012-12-18 11:57 編輯

話說上星期四13號夜晚,伽衷上左我老公手, 我就o係房度望住佢地, 點知個衰仔要黎搵我,想飛過我度,
剪左翼又冇咩飛過既伽衷,直插式向下降落, 我就拿拿林去接返佢上手, 望下佢見佢嘴仔個啄啄有紅色,佢仲舔舔下,我用手摸下濕濕地, 原來崩左小小,流血,心諗有雲南白藥都冇用,我怕佢舔左落肚!之後俾d清用佢飲,定下驚順便洗下個嘴仔,當時佢又冇咩事,仲跳跳扎咁我就冇理喇!
第二日返工我老公打電話黎話伽衷冇咩食過野,平時個衰仔貪玩又簡飲擇食,所以我都冇諗到關尋晚跌到既事,夜晚公司有party,我夜左返屋企,所以冇特別留意兩個小朋友!
星期六見伽衷又唔食野, 冇精神, 冇擒高擒低....死啦!係咪病左呀?定係佢未訓醒呀?之後上磅睇下幾磅先,輕左成20幾30g,心都慌埋,之後即刻打電話去Dr.Eric度同護士姐姐講佢既情況,同有冇位睇醫生,好彩有, 我就放棄去朋友屋企食長腳蟹同鵝肝飛的士去跑馬地!
去到診所等左45分鐘, 終於到我地喇!我就同醫生講佢既情況, 但係到呢刻我都係冇諗到關跌親既事, 仲估佢傷風感冒!Dr.Eric問我呢兩日有冇發生過d咩事?我就同醫生講佢仆崩左個嘴仔,佢就好肯定咁話:"就係咁啦!一定有原因既!"Dr.Eric講左個好長既英文學名(真係要Louis講返先知), 聽到我一頭霧水,仲心諗有冇中文呀,不過冇出聲問!原來鳥類,跌親呀~仆親呀~拉傷,肌肉痛,筋骨痛,都係統稱叫呢個好長既英文學名, 都一樣係咁醫, 因為佢地唔識講野,所以冇好似人類分咁多病既學名!我仲傻到問醫生,伽衷會唔會係傷風感冒呀? 醫生話佢都冇乞痴同鼻水....諗諗下又係喎!
個衰仔仲o係醫生同護士姐姐面前超爹, 個頭收o係翼後面,用無辜又可憐既眼神望住我地咁講左兩聲Hello~我地三個一齊:'哎呀,陰公"! 之後醫生開左10日消炎止痛藥,每日一次,每次0.4ml,返到屋企食少少野,食藥就訓喇!
第二朝一起身就睇下佢有冇好d, 點知打乞痴,流鼻水, 搞咩呀衰仔你,唔好嚇阿媽呀!!!老公就話首先要迫佢食左野先,要佢自己有體力先可以抵抗病菌, 我就即刻落街買木瓜,葡萄糖,順便買埋燕麥片同粟米,上返屋企開小小燕麥糊仔佢食,又肯食喎,食晒..之後隔一陣再餵木瓜, 都肯食喎. 不過都係驚驚地, Dr.Eric星期日冇開, 我打電話去大圍問有冇醫生睇, 護士姐姐話今日好full要問下先, 唯有等下啦~再望下佢,點解d鼻水冇晒, 又冇乞痴既?細路你係咪玩野呀!?護士姐姐再打黎叫我兩點幾去睇醫生,我就推左喇, 因為冇鼻水, 冇乞痴!冇病徵睇黎都唔知做咩~下午椿碎d合成糧撈燕麥加木瓜, 見到都唔想食, 伽衷又好乖,食晒,!上下磅先,升返去原來磅數,都定返d!夜晚食藥訓覺~
星期一唔想返工.雖然日日都唔想返, 但係真係好想全日睇住佢,不過我老公話佢都有食合成糧, 自己咬,我都安樂d!
之後同Harry講返件事, 佢話kiwi都有鼻敏感,會有時打乞痴,流鼻水,不過要小心狼來了,都係要留意佢行為體重, 如果唔係真傷風當鼻敏感就死喇~(真係多謝Harry既問候同分享經驗)
夜晚返到屋企就精神左好多, 走黎走去,不過上手都仲係唔夠力, 希望今晚會再好d啦~
所以今日我都精神左咁去返工!

唔覺唔覺打左咁大篇野, 希望各位樹樹朋友有時間同我分享呢份擔心, 安心同開心啦~