本帖最後由 hahalegolas1991 於 2013-7-8 19:14 編輯
希望大家唔好誤會, 呢個post只係我個人對剪唔剪翼呢個問題o既見解, 我並無意o係呢度挑起任可罵戰, 亦都無意o係任何人傷疤上灑鹽. 只係希望各個主人可以再諗清楚一啲, 再做留翼呢個決定.
相信大家都睇到, 我o岩o岩出o左個post, 有個朋友唔見o左隻迷金. 繼琴日聚會o既悲劇後, 今日五點有個朋友call我, 話佢隻迷金飛走o左. o個隻迷金, 我都同佢玩唔少, 好得意的, 但佢主人, 堅持唔肯同佢剪翼, 又唔上腳鍊就帶佢到室外. 其實我已經多次建議佢剪翼, 最少都上番腳鍊先, 但奈何佢始終都係唔肯, 最終o係今日下午, 因為旁邊倒泥頭發出巨嚮, 隻迷金就飛走o左. 到而家都未搵番. 個主人好錫隻迷金, 走o左我相信佢都唔會好過, 其實我都有啲心酸.
可能有人會話, 剪o左翼承住風其實都可以飛得好好, 無錯我都明白. 但如果剪曬翼上哂鍊佢都係飛走o左, 咁起碼作為主人, 都係有做過工夫丫, 無得賴啲咩可能真係自己唔好彩. 但係又唔剪翼, 又唔上腳鍊, 走雀其實好大機會係自己造成. 我外公都有養鸚鵡習慣, o係佢手上因唔剪翼走失的鸚鵡真係多到我都唔記得, 但到今時今刻, 佢都係唔願做呢一步…
又可能有人會話, 上腳鍊/用飛行繩咪可以囉! 無錯你都係o岩的, 一般情況下.但如果有意外呢? 意外就係意料之外, 相信無人唔知, 如果咁不幸你隻雀扯甩條鍊呢? 如個條繩有破損呢? 到時你隻愛鳥一樣會一去無回頭.
再有可能有人會話, train佢飛手, 飛走都可以叫番來啊! 你都係無錯, 但大家唔好唔記得, 呢個飛手training, 大前提係你隻雀無一飛飛到老遠你影都唔見, 小前提係你隻雀飛o左去一個完全陌生o既環境, 佢冷靜得仲能夠處理你o既指令, 如果兩個前提都達到, 恭喜你, 你能夠接番你隻雀. 如果是但一樣唔達到, 我可以話, 凶多吉少了. 我諗呢棵樹上面, 養緊鸚鵡o既人都能感受到鸚鵡係幾聰明. 但諗深一層, 鸚鵡只係一隻飛鳥, 雖然聰明, 但受驚其實第一個反應正常o黎講都會係飛. 如果係全翼, 佢地更加會依賴飛行o黎逃避危險.
講到呢度, 我並唔係話剪翼一定係o岩(例如主席都話有啲人以為剪o左翼就掉以輕心, 以為帶出街一定走唔甩), 留翼一定係錯. 大家養得鸚鵡, 都係愛鳥之人, 不妨藉住呢一個機會, 反思下究竟自己係想要識飛手鸚鵡聚會o個陣好威威開心啲, 定係留住愛鳥o係身邊開心啲! 走失一隻鸚鵡, 唔係蝕錢咁少事, 你養佢o既心血, 一下就走o左, 仲有, 平時只係識玩o既寵物鳥, 能唔能夠頂得住外面嚴苛o既環境, 其實先係最大問題! |
發表於 2013-7-8 19:10
| 
發表於 2013-7-8 21:00
| 
