分享一下患病經歷...

本帖最後由 gadgeteer 於 2015-2-2 11:24 編輯

養咗三年幾，隻發霉雀第一次患病了....一朝早第一篤便係爛嘅，仲要帶紅色，隨後一、兩個鐘內啲便都係好爛，雖然變番綠色同埋隻發霉雀表面上無乜唔妥（依然多多嘢講多多事實破壞力強等等）（之前嗰晚啲便完全正常），都唔理三七二十一晨早打去銅鑼灣間醫院預約。

從未睇過醫生或去過醫院，接電話嗰個就話當日好 full，不過一聽到係鸚鵡，問過醫生後都收工前抽時間睇我隻發霉雀。

當天，每個時段啲便便都影咗相，一夠鐘，就帶埋發霉雀衝左去醫院。

去到，就填咗張好仔細嘅問卷，問及發霉雀來源生活習慣等，啲問題好相關，好專業。等咗陣，入去見，醫生再補充問多幾條問題，再比啲便相佢睇，乜都唔講即刻驗便便（感覺上又係好專業）。再等咗一等，話我知啲便便有90%菌，即磅重開藥，發霉雀梗係唔食（陌生環境陌生人唔肚餓想快啲走等等無盡因素），跟手用毛巾捉住發霉雀，用管直插落胃囊餵藥。之後比錢，攞藥，走得。

過程中，醫生同護士都話好彩咁早睇醫生，佢地試過有雀帶到嚟醫院時已半死...

藥要一日食兩次，所以返到屋企，都即開暖燈同比發霉雀靜靜地瞓覺。

結果點？過咗兩日，發霉雀啲便終於正常番啲，個心當堂安樂啲，繼續食藥，過幾日覆診同等醫生決定使唔使做其他檢查。

好嘞，講咗咁耐，重點係咩？

一、發覺隻雀有問題，唔好浪費時間上 forum 或問人，直接睇醫生。老實講，你隔空問人或上 forum 問，人地無論幾多經驗，無親眼見過你隻雀，又唔知你隻雀啲習慣，其實對被問者好唔公平，答嘅答案對主人亦未必有用；
二、平時一定要磅重，有兩個好處。一來可以比醫生知你隻雀一向體重如何，二來，亦都好緊要，就係隻雀習慣識得上磅。上磅意思係除咗隻雀識得企上碌棍外仲要識企定定。
三、如過可以的話，平時習慣久唔久用針筒餵食。呢個都重要，因爲要餵藥的話隻雀會合作好多。我就因爲無呢個習慣，初初餵藥慘過打仗。要記住，隻雀已經病，仲要佢學新嘢，佢真係彩你都傻....

純少少分享，希望幫到有需要之主人....

jennymok

新手上路

Rank: 1

31^#

發表於 2015-2-16 23:05 | 只看該作者

大部份寵物食品都係人類食用級別以下, 即不適合人類食用就用來做寵物食品, 問題可能係農藥或防腐劑過多, 尤以瓜子粟子合桃杏仁為甚! 所以我而家只買製造給人食而又無調味的瓜子果仁!
另外壓力及環境改變都可能引致發病, 即等同有些人一緊張便有"腸易激"問題一樣!

分享一下患病經歷...

[收藏此主題] [關注此主題的新回復]

[通過 QQ、MSN 分享給朋友]