啄羊鸚鵡（Nestor notabilis）唔單止係紐西蘭獨有嘅鸚鵡，重係世界上唯一一種住喺高山上嘅鸚鵡。之所以叫「啄羊」，係因為佢哋到咗夜晚，佢哋會走到牧羊場度，割開綿羊嘅毛同皮膚，食綿羊皮膚下面嘅脂肪。由於現時啄羊鸚鵡受到法律保護，因此唔可以傷害佢哋，但亦令到啄羊鸚鵡變得越來越大膽。
同澳洲嘅鸚鵡相比，啄羊鸚鵡顏色反而無咁艷麗，墨綠色嘅翼底下為猩紅色。不過仍保留一把尖銳嘅鉤狀咀，好似瑞士刀咁。非常強壯，比其他鸚鵡更加捱得凍。佢哋並唔係成日飛，佢哋會利用好似雪鞋咁對腳，喺雪地上行而唔會陷落去，除非真係有必要先會飛一陣間。
啄羊鸚鵡智商相當好，記得到以前學過嘅嘢，重識得去邊度搵食。啄羊鸚鵡生性膽大好奇，佢哋嘅咀唔單止可以切開樹枝，撬開硬殼果，有時重會割開遊客嘅車窗玻璃、垃圾袋、甚至高空纜車嘅繩索，啄羊鸚鵡有時重會用咀割開啲窗，走入人哋間屋搵嘢食。
啄羊鸚鵡係機會主義者，食嘢亦好雜，比其他鸚鵡更鍾意食肉。喺紐西蘭南部嘅峽谷度，住咗一啲叫灰鸌嘅海鳥BB，啄羊鸚鵡好鍾意走去掘佢哋嘅山窿，夾住佢哋嘅頸或者腳，再將灰鸌BB拖出嚟分屍。
  |
發表於 2010-11-16 21:12
| 
養2隻太陽
