10.)潘榮記
地址:賣草地大炮台街1號b地下
一睇外表就知佢有好耐年資............成間鋪最出名就係"減蛋金錢餅"
何謂減蛋呢?即係減去蛋白咁o既意思,所以蛋味特別香~
而全店都係用炭燒的,所以會帶有特別點的焦味......
如果有返幾個人,買返10蚊,一人一塊,好快食曬~
------------------------------------------------
11.)台灣帝鈞炭燒胡椒餅
地址:在潘榮記旁
台灣引進,以新鮮豬肉再加胡椒醃制,都幾難唔好食!!
又係用炭燒,個爐仲幾得意,d 餅一個個痴曬係個爐邊燒~
不過提議買一個2份食.因為一人一個會多左小小
-------------------------------------------------
12.)安德魯餅店/瑪嘉烈蛋撻店
地址:路環市中心撻沙街 1 號地下
路環市區打纜街105號
新馬路馬統領街金利來大廈17B地舖(近新浦京)
我食落呢三間野真係一樣味架wow,價錢又一樣,賣o既所有野又一樣,但個名又唔同wow,所以我都係覺得佢係同一個老闆
其他野唔講,只係講個......葡撻,真係唔食唔知原來真係幾好食架wow
個皮夠鬆,個蛋夠熱又唔會過甜,真係比得上香港新鮮出爐o既蛋撻(我係蛋撻fans)
不過呢就真係貴左小小啦,由佢6蚊,加到6.5,e+要7蚊一個啦,雖然水準都叫keep到,但7蚊真係有小小貴
但如果坐低飲杯野食個葡撻,又唔錯o既.....
--------------------------------------------------
13).盛記白粥
地址:新馬路蘇雅利醫生街1號
三盞燈 (新橋)雅廉訪大馬路77號地下
馬場巴波沙大馬路264號南惠閣第2座
好似唔止三間,但我只係有記下這三間的位置
呢間係盛記白粥,雖然話就話賣粥,但佢都有不小糖水賣,呢個芒果豆腐花我推薦,5蚊一碗,佢唔似香港果d,加幾塊芒果係上面就話芒果豆腐花,呢個雖然無果肉,但味道一流~
最緊要佢仲有咸煎餅,甜蛋散,九層芝麻糕等....佢o既甜蛋散味道真係好好食,唔會比d 糖水整到佢淋曬,食落口果陣又甜又卜卜脆, 一流呀~~~仲只係3蚊一舊咋(不過我估要撞o岩佢出爐時間)
另外呢碟只係普通o既腸粉+羅白糕,不過不失,最好係d 醬自己任落~~
--------------------------------------------------
14.)頤德行(李康記)
地址 :新馬路新埗頭街19號D地下
呢間野勁呀...... :,首先唔好講味道......係一條橫街入面居然有檔野要排隊,呢樣都唔緊要.........,最緊要係我下午2點幾3點果陣去到排,排左15分鐘左右啦........,卒之有位到我地入去,5蚊一碗唔貴呀,但想叫個熱豆花....果陣......,佢就話"賣曬,凍熱頭漿都賣曬,得返凍豆花要唔要?"
緊係要啦,排咁耐唔要仲得了.......,不過佢除左加糖水之後,仲會加入花奶,我第一次食豆花會加花奶
卒之等到佢扲黎啦,真係名不虛傳,個面波平如鏡!d 豆花又白又滑,花奶仲可以帶返出小小豆味,5蚊碗真係要黎試下
不過記得早d 黎,因為當我地未食完果陣,佢已經賣光光........雪櫃d關掉,老闆係度埋緊數,一日係咁多碗就咁多碗,賣曬就無,唔理係幾點......所以有興趣就早d 去啦
有人兄話無豆味,我都有同意,不過都幾好食呀
-----------------------------------------------
15.)禮記雪糕
地址 :中區荷蘭園大馬路12號地下
人人都話唔好食,好難食,唔會再去食咁!我去左澳門咁多次,行過左咁多次都未食過,今次就食下啦!
因為唔肚餓,天氣又唔太熱,就咁買個紅豆雪條外賣就算
食一啖.....唔係幾好呀,好多豆,多過紅豆冰冰,又唔會太甜,4蚊一支,不過不失呀!
我食完起碼下次會再食,可能我無試其他,但感覺都幾好!
不過如果雪糕方面，食完h記果d 之後......的確應該有d 距離
---------------------------------------------------
16).文記
地址:三盞燈 (新橋)光復街渡船台交界
我成日叫呢間野做蝦蝦蝦雲吞,點解呢?睇落去就知
不過佢又係開夜晚,夏天又係會好熱.......所以都係提議大家冬天先去食啦
我都唔係第一次黎食,先講佢湯底,不過不失啦,再講佢麵質,都係普普通通啦,不過河粉唔夠滑~
到重頭戲啦,就係粒雲吞,粒粒都係有3隻蝦,名副其實o既鮮蝦雲吞!!
一粒雲吞有3隻蝦,無加價,兩個"食送"都係17蚊
佢仲有鳳爪,鵝腸,咖哩雞等"食送"
----------------------------------------------
17.)四哥小食3
地址:新馬路營地大街119號A
佢仲有兩間分店,一間係三盞燈果頭,不過果間就開下午5點半至零晨的
酸辣湯底開胃好味,牛丸彈牙有肉味,19蚊一碗抵食
呢間野係人地推薦黎試下O既,因為我知道佢 D 煎餃唔錯的說!
前後黎過2次,分別食過煎餃、小籠包、桂林米粉同埋豆漿
呢間野D 煎餃真係唔錯,啖啖肉,仲有小小肉汁,不過我覺得鍋貼大王會好過佢,但四哥D 醋先係主角,食佢D 醋真係會令人食唔停
小籠包就皮厚左D,雖然我鐘意食皮厚,但可惜比其他食物比下去
牛丸酸辣湯桂林米粉一流,湯濃,牛丸彈牙,米粉爽口,簡直係一個完美O既配合
豆漿就普普通通,不過不失咁
其實仲有個炸蝦餅想食,但無相,又係好好食,唔係太識點形容,不過有d 似煎有蝦o既蛋餅咁啦
[ 本帖最後由 煙花 於 2009-7-28 00:02 編輯 ] |
發表於 2009-7-27 22:47
| 
因為有鸚鵡朋友問,澳門有咩玩有咩好食呀,咁我就用今晚o既時間整理一下.......
,叫做好過無啦......反正我鐘意食提子多d
